678670, с.Чурапча ул. Карла Маркса 19 +7(984)1182258 m.haacka@gmail.com

ТӨРӨӨБҮТ КҮҤҤҮНЭН, ТАПТАЛЛААХ ЧУРАПЧЫМ!

Сыллата ыытыллар Чурапчы нэһилиэгин күннэрэ быйыл балаҕан ыйын 6—7 күннэригэр буоллулар. Бырааһынньык кэмигэр сквердэри аһыы, уулуссалары сырдатар уоттары киллэрии, ыспартыыбынай күрэхтэһиилэр, атыы-тутуу, араас куонкурустар, эҕэрдэ кэнсиэрдэр, бырааһынньыктааҕы фейерверк, о. д. а. тэрээһиннэр тустаах бырагырааманан, чаастарынан аттарыллан, ыытылыннылар.

„ТӨРӨӨБҮТ КҮҤҤҮНЭН, ТАПТАЛЛААХ  ЧУРАПЧЫМ!“

 БЫРААҺЫННЬЫГЫ АҺЫЫ  ҮӨРҮҮЛЭЭХ  ЧААҺА

Бырааһынньыгы эҕэрдэлээбиттии, күһүҥҥү сырдык чаҕылхай күннээх, ыраас-чэбдик салгыннаах, нуурал күҥҥэ П. Е. Барахсанов аатынан култуура уонна сынньалаҥ пааркатыгар дьон-сэргэ үөрэ-көтө тоҕуоруста. Киирэр аантан саҕалаан, атыы-тутуу ыытыллан, „Күһүҥҥү киһи күлбүтүнэн“ дэтэрдии, оҕуруот аһын арааһа, айылҕабыт бэлэҕэ хаптаҕас, дьэдьэн, моонньоҕон, отон барыанньалара, далбар хотуттарбыт барахсаттар астаабыт араас суол астара, мындыр уустарбыт оҥоһуктара туруорулуннулар. Сыл аайы сибэкки арааһа элбээн иһэрэ кэрэҕэ, сырдыкка тардыһыы туоһутунан буолан санааны көтөҕөр.

Үөрүүлээх чааһы арыйыыга тыл эппит Чурапчы нэһилиэгин баһылыга Владимир Сивцев,  нэһилиэк дьокутааттарын Сэбиэтин бэрэсэдээтэлин солбуйааччы Августа Захарова быйылгы бырааһынньык Чурапчы нэһилиэгэр биллэриллибит Гражданскай инициатива сылын чэрчитинэн ыытылларын бэлиэтээтилэр. Чурапчы сэлиэнньэтэ сылтан сыл улаатан, тупсан иһэрин, ол туоһутунан сотору „Мичил“, „Улыбка“ саҥалыы тииптээх уһуйааннра, 5 этээстээх дьон олорор дьиэтэ, физическэй култуура уонна успуорт үнүстүүтүн устудьуоннара олорор уопсайдара үлэҕэ киириэхтээхтэрин, сквердэр аһыллыбыттарын, уулуссалары сырдатар электроуот киллэриллибитин эттилэр, маннык үлэлэр салгыы былаан быһыытынан ыытыллыахтара диэтилэр. Маныаха нэһилиэк дьоно-сэргэтэ улахан көмөлөрүн, өйөбүллэрин иһин махтаннылар. Чурапчы нэһилиэгэр баһылыгынан үлэлээбит Саха Өрөспүүбүлүкэтин ыччат политикатыгар уонна социальнай коммуникацияларга миниистирэ Степан Саргыдаевка „Чурапчы нэһилиэгин бочуоттаах гражданина“ аат иҥэриллибитин истэн, бырааһынньыкка мустубут дьон дохсун ытыс тыаһынан доҕуһуоллаатылар. „Чурапчы нэһилиэгин сайдыытыгар киллэрсибит кылаатын иһин“ бэлиэнэн, өйдөбүнньүк  бэлэҕинэн Александр Андреев, баһылык Махтал суругунан, чаһынан Иван Тимофеев, Махтал суругунан Светлана, Дмитрий Ивановтар, Махтал суругунан, өйдөбүнньүк манньыатынан Антон Иванов, Иван Беляев, Гавриил Платонов, Константин Дьячковскай наҕараадаланнылар.

Степан Саргыдаев өрөспүүбүлүкэ ыччатын, тус бэйэтин аатыттан бырааһынньыгынан эҕэрдэлээтэ, үрдүк наҕарааданы ылбытынан махтанна, бу наҕараада нэһилиэк дьонун-сэргэтин бүттүүнүн үтүөтэ-өҥөтө буоларын бэлиэтээтэ, Чурапчы ситиһиититтэн үөрэрин, киэн туттарын эттэ, салгыы өссө сомоҕолоһон  сайдыы туһугар үлэлииргэ-хамсыырга ыҥырда.

Улуус дьокутааттарын Сэбиэтин бэрэссэдээтэлэ Афанасий Захаров, үөрэх управлениетын начаалынньыга Юрий Посельскай, улуус дьаһалтатыттан Рустам Данилов, Мария Заболоцкая, Мария Аянитова эҕэрдэ тыл эттилэр.  Афанасий Захаров Туяра Софроноваҕа Саха Өрөспүүбүлүкэтин Ил Дарханын Ыйааҕынан „Муниципальнай сулууспа туйгуна“ аат иҥэриллибитин туоһулуур бэлиэни туттарда.  „Улуус социальнай экономическай сайдыытыгар киллэрсибитин кылаатын иһин“ үһүс истиэпэннээх анал бэлиэнэн Варвара Пудова, улуус баһылыгын, дьокутааттарын Сэбиэтин Бочуотунай грамотатынан Василий Попов наҕараадаланнылар.

Үөрүүлээх чаас Дьокуускайдааҕы култуура колледжын „Күн өркөн“  айар кэлэктиибин кэнсиэринэн доҕуһуолланна.

Ааптар: Алексей  СЛЕПЦОВ

ХОМОҔОЙ  ХОҺООН  ТҮҺҮЛГЭТЭ

Чурапчы нэһилиэгин күннэрин бырааһынньыгын чэрчитинэн ааҕааччылар „Хомоҕой хоһоон түһүлгэтэ“ куонкурустара буолла. Куонкурус паарка соҕуруу өттүгэр тыа быыһыгар баар дүөдэ  үрдүгэр анаан бэлэмнэммит түһүлгэҕэ ыытылынна. Ыраас чуумпу ньууругар күн чаҕыла оонньообут,  фонтан күлүмүрдэс уутун тула куба макеттара талбаара устубут, кырдьык даҕаны  „күһүҥҥү серенадаҕа“ доҕуһуоллатан,  уран тыл маастардарын ааҕыыларын иһиттилэр.

Куонкурус үс хайысхаҕа араарылынна.  Дьуон Дьаҥылы хоһооннорун ааҕыыга Николанна Бушуева—Арчылаана Чараҥ  „Биһик ырыата“ хоһоонунан кыайыылааҕынан буолла, иккиһи Иван Попов—Байдам „Тууйас“ хоһоону, үсүһү Полина Игнатьева—Намыына „Сарсыардааҥы саһарҕа“ хоһоону ааҕаннар  ыллылар.

Чурапчы туһунан хоһооннору ааҕыыга  „Арчы“ дьиэтин бэтэрээннэрин „Тыыннаах тыл“  бөлөҕө (Надежда Заболоцкая,  Наталья Захарова, Елизавета  Попова, Наталья Устинова, Гурий Монастырев. Алексей Слепцов)  „Чурапчыбын туойабын“ композициянан кыайыылаах буолла.  Иккиһи Евдокия Кузьмина—Дьэбдьиэйэ „Чурапчы“, үсүһү Николай Башарин—Ньукуус „Тоҕус томтор“ диэн бэйэлэрэ суруйбут айымньыларын ааҕан ыллылар.

Көҥүл тиэмэҕэ Сарыал Охлопков А. Е. Кулаковскай „Арыгы“ хоһоонун ааҕан кыайыылааҕынан буолла.  Иккис миэстэни  Муосчут кыыһа Айылгы  Пинигина Б. Мотурова „Айаҥҥа“  хоһоонун Сайа тылбааһыгар ааҕан ылла, үһүс Наталья Сергеева—Аана Кыыһа „Киһи тоҕо олорор“ бэйэтэ суруйбут хоһоонун ааҕан буолла.

Кыайыылаахтар анал дипломнарынан, бириистэринэн наҕараадаланнылар.

Ааптар: Алексей  СЛЕПЦОВ

Источник http://ulus.media/2019/09/11/churapchyga-ne-iliek-k-nnerin-kie-dalaa-ynnaahtyk-belieteetiler/

Добавить комментарий


Защитный код
Обновить

Наши партнеры