678670, с.Чурапча ул. Карла Маркса 19 +7(984)1182258 m.haacka@gmail.com

ЧУРАПЧЫГА “МОХСОҔОЛ” КҮРЭХ УОЛ ОҔОНУ УГУЙАР

Бүгүн, олунньу 19 күнүгэр, Чурапчы улууһун уһуйааннарын икки ардыларыгар «Мохсоҕол» байыаннай-спортивнай күрэхтэһии Улуу Кыайыы 75 сылын уонна Аҕа дойдуну көмсүкээччилэр күннэрин көрсө ыытылынна. 

Үгэс быһыытынан сыл аайы Аҕа дойдуну көмүскээччи күнүн иннинэ буолар бу күрэхтэһиигэ уһуйаан улахан бөлөхтөрүн  уолаттара кытталлар. Итиэннэ, быйыл эмиэ улуус киинигэр Чурапчыга Афанасий Софронов аатынан култуурунай-спортивнай кииҥҥэ нэһилиэктэртэн 19 хамаанда — 133 оҕо кэлэн күрэхтэстэ.

   
“Мохсоҕол” байыаннай-ыспартыыбынай күрэхтэһиини көҕүлээччинэн, тэрийээччинэн Чурапчытааҕы “Кэскил” уһуйаан буолар. «Кэскил» уһуйаан оччотооҕу физкултуураҕа инструктора Ольга (Слепцов) Ложкина уонна уһуйаан методиһа Анна Шарина бырайыак оҥороннор, бу күрэхтэһиигэ маҥнай Чурапчы сэлиэнньэтин иһинээҕи уһуйааннар кыттыбыттара, онтон кэлин улуустааҕы Үөрэх управлениета  биһирээн, улуус үрдүнэн ыытыллар буолбута. Быйыл тэрээһин 12-с сыла.

Күрэхтэһии былааҕын “Кэскил” уонна “Мичил” уһуйааннар хамандыырдара көтөхтүлэр. Хамаандалары, тэрийээччилэри күрэхтэһии саҕаламмытынан истиҥник эҕэрдэлээн, улуустааҕы Үөрэх управлениетын сүрүннүүр исписэлииһэ Маргарита Оконешникова, бойобуой дьайыылар бэтэрээннэрэ Иван Адамов тыл эттилэр. Күөн көрсүһүү I түһүмэҕэр строевой көрүү, II түһүмэҕэр эстафета (9 этээптээх моһоллордоох сүүрүү) буолла. Тыҥааһыннаах, интэриэһинэй киирсии кэнниттэн «Мохсоҕол-2020» ХII улуустааҕы байыаннай-спортивнай оонньуу уопсай түмүгэ таҕыста.

 

Кыайыылаах хамаандалар:

I – “Чуораанчык” Чурапчы (Үөрэх салалтатыттан бириис);

II – “Улыбка” Чурапчы (“Удьуор” эр дьон түмсүүтүн бирииһэ);

III – “Күнчээн” Хайахсыт (Үөрэх салалтатын эр дьонун түмсүүтүттэн бириис).

“Бастыҥ хамандыыр”

I —  Эрсан Гурьев, “Улыбка” Чурапчы — Бойобуой дьайыылар бэтэрээннэрин түмсүүтүн бирииһэ;

II — Рома Ноговицын, “Сулусчаан” Сылаҥ;

III — Дамир Петров, “Күнчээн” Одьулуун;

Бастаабыт хамаанда кубогынан, грамотанан, хас биирдии чилиэнэ мэтээлинэн, анал бириистэринэн наҕараадаланнылар.


Уол оҕону иитиигэ туһуланар дьаһал быйылгы 12 сыллаах тэрээһининэн, улуус, нэһилиэк аҕаларын, эр дьонун уопсастыбаннай түмсүүлэрэ кытыннылар, анал бириистэри туруордулар. Сүрүн судьуйанан Ил Түмэн дьокутаата, саппаас хапытаана Семен Никитин үлэлээтэ.

Дьүүллүүр сүбэҕэ бойобуой дьайыылар бэтэрээннэрэ Иван Адамов, Дмитрий Коркин, үөрэх салалтатын исписэлииһэ Иван Лукин, улуус социальнай-психологическай киин салайааччыта Антонина Капрынова сыаналаатылар.

— «Мохсоҕол» күрэхтэһии уол оҕону төрөөбүт дойдуну таптыырга, харыстыырга, кинини көмүскээччи,  араҥаччылааччы тыыныгар иитэринэн ураты суолталаах. Бу күрэххэ оҕолор бэйэлэрин бэлэмнэрин, кыайыыга дьулуурдарын көрдөрөллөр,  саастыылаахтарын кытта кыахтарын тургуталлар. Физкултуура салайааччылара уопуттарын атастаһаллар, сатабылларын көрдөрөллөр. Күрэхтэһэр хамаанда ахсаана сылын ахсын эбиллэ, кыттааччытын бэлэмэ тупса, хаачыстыбата үрдүү турара, бииртэн биир, саҥаттан саҥа хамаанда кыайыыны ситиһэрэ, «Мохсоҕол» күрэхтэһии туруоруммут сыалын-соругун таба тутуһан иһэрин  туоһулуур. Итиэннэ биһиги күрэхпитигэр наар күүс-көмө буолар Ил Түмэн дьокутаата Семен Никитиҥҥэ, улууспут, нэһилиэкпит эр дьонун түмсүүлэригэр дириҥ махталбытын тиэрдэбит, – диэтэ күрэхтэһиини тэрийээччи “Кэскил” уһуйаан сэбиэдиссэйэ Анастасия Григорьева.

Ааптар: Сэмэн Жендринскэй.

Источник: UlusMedia

Добавить комментарий


Защитный код
Обновить

Наши партнеры