678670, с.Чурапча ул. Карла Маркса 19 +7(984)1182258 m.haacka@gmail.com

СӨ ИЛ ТҮМЭН ДЬОКУТААТТАРА ЧУРАПЧЫГА СЫРЫТТЫЛАР

Бэҕэһээ, ахсынньы 22 күнүгэр, СӨ Ил Түмэн Судаарыстыбаннай Мунньаҕын бэрэссэдээтэлэ Петр Гоголев, Ил түмэн дьокутааттара Михаил Гуляев, Семен Никитин, СӨ Ил Түмэн аппаратын информационнай-аналитическай салалта начаалынньыгын солбуйааччы Георгий Иванов, Чурапчытааҕы успуорт уонна физкултуура үнүстүүтүн уонна Чурапчытааҕы техническэй колледж үлэтин-хамнаһын билистилэр, туруорсар боппуруостарын иһиттилэр.

Үнүстүүт, Д.П. Коркин аатынан Чурапчытааҕы ыспартыыбынай интэринээт-оскуола матырыйаалынай-техническэй баазатын тупсарыы, үөрэх сайдыытын боппуруостарын тула кэпсэтии ыытылынна. Ректор Иннокентий Готовцев тэрилтэ  үлэтин, ситиһиитин билиһиннэрдэ. Итиэннэ хомунаалынай ороскуоту кыччатар инниттэн энерго-киини тутуу табыгастаах буоларын быһаарда. Үнүстүүтү национальнай успуорт көрүҥнэрин уонна единоборствоны сайыннарар анал хайысхалаах оҥорорго туһуламмыт бырайыагы СӨ Инвестиционнай бырагырааматыгар киллэрэргэ туруоруста. Биэрэктэри бөҕөргөтөр үлэлэри тэрийэргэ, үнүстүүт территориятын суолларын оҥоруу наадатын эттэ. Ону таһынан Олимпийскай эрэллэри  бэлэмниир оскуолаҕа  анал  дьарыктанар саала суоҕун бэлиэтээтэ.

 

Ил Түмэн дьокутаата Михаил Гуляев анал дьарыктанар успуорт сааланы тутарга ханна, хайдах былааннаахтык туруорсуохха наадатын эттэ. Үнүстүүт сайдыытын кэнсиэпсийэтин болдьоҕун уһатан биэрэргэ,  энерго-киин  тутуутун  түргэнник туруорсарга сүбэлээтэ.

Оҕо ыспартыыбынай оскуолатын дириэктэрэ, улуус дьокутаата Яков Оконешников орто хамнас үрдүү турарын бэлиэтээтэ. Онуоха орто оскуола учууталларыттан үлэһиттэр, тириэньэрдэр хамнастара кыратын, ону үрдэтэргэ туруоруста. «Ыспартыыбынай» ТОС сыллата кэҥээн иһэринэн, оскуола – саад тутуллуон наадатын туһунан санаатын үллэһиннэ. Итини таһынан улуус дьокутааттарын Сэбиэтин бэрэссэдээтэлэ Афанасий Захаров Гаврил Дмитиревич Протодьяконов сырдык аатыгар Арассыыйа Дьоруойа  ааты  иҥэрэргэ хаста да докумуон түһэрбиттэрэ ааспатаҕын бэлиэтээтэ. Онон Улуу Кыайыы 75 сылын көрсө бу боппуруоһу өйүөхтэрэ диэн эрэнэн туран хадатаайыстыбаны Судаарыстыбаннай Мунньах бэрэссэдээтэлигэр Петр Гоголевка туттарда.

Дьаһал кэнниттэн Ил Түмэн дэлэгээссийэтэ үнүстүүт саҥа уопсай дьиэтигэр  уонна «Боотур Уус»  стадиоҥҥа сырыттылар.

Салгыы Чурапчытааҕы техническэй колледжка тиийэн, кэлэктииби, устудьуоннары кытары көрүстэ.

Аһаҕас көрсүһүүгэ Мунньах бэрэссэдээтэлэ Петр Гоголев аһаҕас парламент үлэлэрин хайысхатынан улуустары, нэһилиэктэри кэрийэн, олохтоохтору кытары көрсөн, кинилэр санааларын, кыһалҕаларын истэн, ону барытын түмэн, ырытан, үлэлэригэр уларытыылары киллэрэллэрин туһунан сырдатта. Саха Өрөспүүбүлүкэтигэр исписэлиистэри сыаллаан үөрэтии  кэнсиэпсийэ былырыыҥҥыттан дьүүллэнэр боппуруос буоларын бэлиэтээтэ. Онон быйыл барытын чопчулаан, манна олоҕуран сокуон ылыныахтаахтарын иһитиннэрдэ. Ол иһин сыаллаан үөрэтии бэрээдэгин, ол эбэтэр ким хайдах үөрэниэхтээҕин, хантан үбүлэниэхтээҕин туһунан боппуруостарга санаа үллэстээри, улуустарга  үөрэх тэрилтэлэрин кэрийэллэрин бэлиэтээтэ.

Улуустааҕы бэтэринээрийэ салалтатын салайааччыта Владимир Еремеев Чурапчытааҕы колледж бэтэринээринэй үөрэхтээһинигэр (Одьулууннааҕы агротехникум холбоһон) үөрэнэр устудьуоннары  бэтэринээринэй лабораторияҕа үөрэтэбит, ыйан-кэрдэн биэрэбит диэтэ. Онон  анал  лаборатория тутуута наадалааҕын туһунан  туруоруста.

Улуус бочуоттаах донора Николай Новгородов  хаан биэриитигэр өрөспүүбүлүкэ өттүттэн көмө көрүллэрэ наадатын уонна отунан эмтиир исписэлиистэри үөрэтии баар буолуохтааҕын  туһунан санаатын үллэһиннэ.

Колледж үлэһитэ Туйаара Портнягина кэнники сылларга бэйэ дьыалатын арыйыыга болҕомто уурулларын бэлиэтээтэ. Маныаха устудьуоннар үөрэхтэрин бүтэрэллэригэр бэйэ дьыалатын арыныыга, сайыннарыыга толору билиини ылбаттарын ыйда. Маны быһаарарга,  үп-харчы өттүгэр билиилээх буолалларыгар үөрэх тэрилтэлэригэр туох  уларыйыылар буолуохтарын сөбүн ыйытта.

Колледж үлэһиттэрэ, Егор Башарин балыыһа тутуутун туһунан туоһуластылар, Иннокентий Красильников  орто профессиональнай үөрэхтээһин үлэһиттэригэр «Земский учитель», «Земский доктор» курдук көмө, социальнай  бырагыраамалар тоҕо үлэлээбэттэрин ыйытта.

Устудьуоннар ааттарыттан Егор Боякинов саҥа уопсай тутуутун боппуруоһун көтөхтө уонна устудьуоннар сэбиэттэрэ хомуйбут илии баттааһыннаах көрдөһүүлэрин СӨ Ил Түмэн бэрэссэдээтэлигэр  Петр Гоголевка туттарда. Петр Васильевич бу боппуруоһу бэбиэскэҕэ ылан, туруорсуохпут диэн дьаһал кыттыылаахтарыгар эрэннэрдэ.

 

Ааптар: Марфа ПЕТРОВА.

Добавить комментарий


Защитный код
Обновить

Наши партнеры