678670, с.Чурапча ул. Карла Маркса 19 +7(984)1182258 m.haacka@gmail.com

ЧУРАПЧЫГА ИЛ ТҮМЭН ДЬОКУТААТТАРА ОЛОХТООХТОР САНААЛАРЫН ИҺИТТИЛЭР

Ахсынньы 18 күнүгэр Чурапчы улууһун дьаһалтатын аактабай саалатыгар  СӨ  Ил Түмэн Судаарыстыбаннай Мунньаҕын дьокутааттара  Михаил Гуляев, Андрей Находкин,  Василий Местников, Семен Никитин  нэһилиэнньэни кытта көрүстүлэр. Кинилэри сэргэ улуус баһылыгын э.т. Алексей Ноговицын, улуус дьокутааттарын Сэбиэтин бэрэссэдээтэлэ Афанасий Захаров кытыннылар.

Норуот дьокутааттара улуус нэһилиэктэрин хабан, олохтоохтору кытта көрсөн, туох кыһалҕалаахтарын билсэр, үлэҕэ-хамнаска туох саҥа уларыйыылар баалларын билэр, дьон-сэргэ санаатын истэр сыаллаах маннык көрсүһүүлэри тэрийдилэр.

Мунньахха улуус нэһилиэктэрин баһылыктара, дьокутааттара,  актыыптара, улуус тэрилтэлэрин салайааччылара, бааһынай хаһаайыстыбалар бэрэстэбиитэллэрэ сырыттылар.  Михаил Гуляев кэлэр 2020 сылга  бигэргэммит СӨ Судаарыстыбаннай бүддьүөтүн туһунан  билиһиннэрдэ. Ил Дархан  Айсен Николаев аҕыйах хонуктааҕыта билиһиннэрбит Анал этиитигэр олоҕуран, кэлэр өттүгэр ыытыллыахтаах  үлэ  сүрүн хайысхаларыгар тохтоото, национальнай бырайыактар  чэрчилэринэн үлэлэри сиһилии сырдатта. Маныаха сүрүннээн тыа хаһаайыстыбатыгар, бырамыысыланнаска, доруобуйа харыстабылыгар сыһыаннаах боппуруостар таарылыннылар.

Салгыы Ил Түмэн тыа хаһаайыстыбатыгар бастайааннай кэмитиэтин бэрэссэдээтэлэ Андрей Находкин уонна олохтоох бэйэни салайыныы боппуруостарыгар бастайааннай кэмитиэтин бэрэссэдээтэлэ  Василий Местников бэйэлэрэ  үлэлэһэ сылдьар туһааннаах хайысхаларыгар туох саҥа сокуоннар, бырагыраамалар киирбиттэрин,  ааспыт сылларга ылыныллыбыт  сокуоннарга уонна бырагыраамаларга туох саҥа уларыйыылар баалларын, онно судаарыстыбаннай бүддьүөттэн  үп  көрүллүүтүн туһунан билиһиннэрдилэр.

Онуоха сүрүннээн Ил Дархан  2020-2024сс. бигэргэппит өрөспүүбүлүкэ судаарыстыбаннай бырагыраамаларыгар уонна “Тыа хаһаайыстыбатын  стратегическай сайдыыта”  ыйааҕар олоҕуран, тыа хаһаайыстыбатын хайысхатыгар үбүлээһин боппуостара таарылынна.  “2020-2024 сс. Тыа хаһаайыстыбатын сайыннарыы”, “Тыа сирин территорияларын кэлимник сайыннарыы” бырагыраамаларыгар туох уларыйыылар тахсыбыттарын, олохтоох бэйэни салайыныы, Үөрэх, Доруобуйа харыстабыла, ОДьКХ о.д.а.  хайысхаҕа туһуланар бырагыраамаларга үп тыырыллыытын, оптимизация боппуруостарын  сырдаттылар.

Салгыы мунньахха кэлбит дьон норуот дьокутааттарыгар боппуруостары биэрдилэр, этиилэри киллэрдилэр. Онуоха  тыа хаһаайыстыбатынан дьарыктанар Чурапчы дьоно үүт туттарыытын сыаната  2016 сылтан  үрдээбэккэ турарын бэлиэтииллэр, ыанньык сүөһү төбөтүгэр көрүллүөхтээх  35 тыһ. солк. субсидияны  утаралларын  биллэрдилэр, оттон кэпэрээссийэлэри тэрийиини биһирииллэр.  Сылгыны иитии сокуоннарыгар,  кэлэр өттүгэр  чааһынай хаһаайыстыбалартан эти тутуу боппуруостарыгар үгүс ыйытыы, этии киирдэ.   Итини тэҥэ улуус олохтоохторун  доруобуйа харыстабылыгар, олохтоох бэйэни салайыныыга үлэ миэстэтин сарбыйыы, нэһилиэктэри холбооһун, нэһилиэктэргэ ититии ситимин, гааһы киллэрии  о.д.а. тыа сирин сайдыытыгар туһуламмыт  үгүс боппуруос долгутар.

Норуот дьокутааттара  мунньах кыттыылаахтарыттан киирбит боппуруостар уонна этиилэр оруннаахтарын, ити туһугар өрөспүүбүлүкэ үрдүкү салалтатыгар туруорсарга бэлэмнэрин, онуоха  Бырабыыталыстыба отчуотугар  нэһилиэнньэ өттүттэн  эмиэ тус этиилэрин киллэрэллэригэр эттилэр.

Ааптар: Анна ЗАХАРОВА.  

 

Добавить комментарий


Защитный код
Обновить

Наши партнеры