678670, с.Чурапча ул. Карла Маркса 19 +7(984)1182258 m.haacka@gmail.com

ЧУРАПЧЫЛАР ЫРААС, АЙЫЛҔА УУТУН ИҺЭР БУОЛУОХТАРА

Бүгүн, сэтинньи 28 күнүгэр, Чурапчы нэһилиэгэр Липпэлээх күөлүн үрдүгэр “Айылҕа уута” дьоҕус модульнай сыаҕы арыйдылар. Улууска уу – сүрүн тыын боппуруос, ол онно сөп түбэһиннэрэн дьон-сэргэ уопсай туруга чөл буоларыгар анаан бу маннык сыах тутуллуута уопсай үөрүү буолар.

Чурапчы нэһилиэгин сайдыытыгар кэнники сылларга элбэх үлэ ыытылларолортон биирдэстэрэ “Коммунальные технологии” ХЭТ оҥорон таһаарар ыраас уута инники сайдыыга улахан хардыы.

Сыаҕы арыйар үөрүүлээх чааска улуус баһылыгын эбээһинэһин толорооччу Алексей Ноговицын, улуус дьокутааттарын Сэбиэтин бэрэссэдээтэлэ Афанасий Захаров, улуус баһылыгын социальнай боппуруостарга солбуйааччы Николай Аммосов, улуус баһылыгын экономика уонна инновация боппуруостарыгар солбуйааччы Алексей Егоров, Чурапчы нэһилиэгин баһылыга Владимир Сивцев о.д.а. кыттыыны ыллылар.

Аалай кыһыл лиэнтэни ууну оҥорон таһаарар сыах салайааччыта Михаил Барашков, сыах учредителлэрэ Владимир Макаров уонна Гаврил Дьячковскай быстылар.

Дьоҕус модульнай сыахпыт үлэҕэ кииритигэр күүс-көмө буолбут дьоммут бары бүгүн кэллилэр: улуус, нэһилиэк дьаһалталара, СЭС үлэһиттэрэ. “Күөл уута эмиэ ыраастанар,” – диэн этиини тутуһан бу сыаҕы тэриннибит. Сыахпыт икки түһүмэҕинэн үлэлиир, маҥнай уу кутуллан баран ырааһырыы, атын туох даҕаны кир-хах суох буолуутун мэктиэлиир бырассыаска киирэр оттон иккис түһүмэх тупсарыллыбыт таһымҥа таһааран пластмасс бытыылкаларга кутуллар. Бу маннык ууну сиикэйдии даҕаны иһиэххэ сөп буолар. Улууспут дьоно, тэрилтэлэр “Айылҕа уутун” хамаҕатык сакаастаан бэйэлэрин туһаларыгар толору туһаныахтара диэн улаханнык эрэнэбит”,  – диир сыах учредителэ Владимир Макаров.

 

Киһи 80% ууттан турар диэн учуонайдар быһаараллар, онон “Айылҕа уута” үлэтэ-хамнаһа тахсан дьон-сэргэ уопсай туһаныытыгар тахсарын баҕарабыт.

Ааптар: Сэмэн Жендринскэй.

Источник: UlusMedia