Сэтинньи 15-16 күннэригэр оҕолорго көҥүл тустууга бастакы Аан дойду чөмпүйэнээтин боруонса призера, СССР успуордун маастара, Арассыыйа физическэй култуураҕа уонна успуорка, уопсай үөрэхтээһиҥҥэ туйгуннара, Чурапчы улууһун Бочуоттаах олохтооҕо Семен Прокопьевич Макаров бирииһигэр оҕолорго көҥүл тустууга аһаҕас өрөспүүбүлүкэтээҕи турнир саҕаланна.
Бүгүҥҥү күн үөрүүлээх чааһыгар, бары дириҥник убаастыыр киһибит Семен Прокопьевич үйэ аҥарын анараа өттүгэр доҕоро Илларион Федосеевтыын, Улуу тириэньэр Дмитрий Петрович Коркин уһуйуутунан бастакытын ыытыллар Аан дойду күрэхтэһиитигэр тиийэн Саха норуотун пьедестал үрдүкү кирбиитигэр таһаарбыттарын бэлиэтиир түгэн буолла.
Манна улуус дьокутааттарын Сэбиэтин бэрэссэдээтэлэ Афанасий Захаров, СӨ сүүмэрдиир хамаандатын бэлэмниир киин дириэктэрэ, көҥүл тустууга норуоттар икки ардыларынааҕы кылаастаах успуорт маастара Леонид Спиридонов, Олимпийскэй оонньуулар призердара, көҥүл тустууга СССР успуордун үтүөлээх маастара Александр Иванов, СӨ бырамыысалыннас уонна геология миниистирин бастакы солбуйааччы Михаил Кириллин, Чакыр нэһилиэгин баһылыга Константин Лебедев эҕэрдэ тыллары эттилэр. Манна Олимпийскэй призер Александр Николаевич, тириэньэрэ Дмитрий Петрович кинилэри барыларын ол саҕаттан систиэмэлээхтик, дириҥник былааннаан туран дьарыктаабытын бэлиэтээтэ уонна Илларион Федосеевы кытары Семен Макаров Аан дойдуга саха тустууктара тахсалларыгар бастакы хардыыны оҥорбуттарын, бу олус улахан ситиһии буоларын тоһоҕолоон бэлиэтээтэ.
Семен Прокопьевич Макаров дьиҥ чахчы саха сэмэй, хаһан даҕаны мин дэгиттэр ыспарсымыаммын дэммэтэх судургу киһи. Ол эрэн биһиги кинини айылҕаттан айдарыылаах тириэньэр быһыытынан билиниэх тустаахпыт, кини үлэлээбит сылларыгар 15 успуорт маастарын, Саха АССР уонна Арассыыйа чөмпүйүөннэрин, призердарын дьарыктаан таһаарбыта. Кинилэр истэригэр Арассыыйа успуордун маастара Станислав Захаров, Иван Ярыгин аатынан норуоттар икки ардыларынааҕы турнир призера Владимир Филиппов, Чурапчытааҕы интэринээт оскуола тириэньэрэ Альберт Макаров о.д.а. күн бүгүҥҥээҥи диэри тириэньэрдэрин Семен Прокопьевич суолун батыһан көҥүл тустуу өрөспүүбүлүкэҕэ сайдарын туһугар үлэлии-хамныы сылдьаллар.
Итини этэн туран улуус, нэһилиэк дьаһалталара, Семен Прокопьевич бары доҕотторо, үөрэнээччилэрэ, үлэлии сылдьар тэрилтэтэ, тэҥҥэ алтыһар тириэньэрдэрэ, улуус бөдөҥ тэрилтэлэрин салайааччылара, улуус тутаах салаатын начаалынньыктара бары кыттыһан күндү киһибитигэр бүгүҥҥү өрөгөйдөөх күнүнэн эҕэрдэлээн чиэстээн туран ВАЗ 21-2140 мааркалаах муус маҥан “НИВА” массыына күлүүһүн туттардылар.
Семен Прокопьевич олус долгуйан туран барыларыгар дириҥник махтанна, күрэхтэһээччилэргэ ситиһиини, кыайыыны-хотууну баҕарда.
Санатан эттэххэ, турнирга уопсайа 8 улуустан 147 кыттааччы кэлэн икки көбүөрүнэн күрэхтэһиини саҕалаатылар, сарсын финальнай хапсыһыылар буолаллара күүтүллэр.
Ааптар: Сэмэн Жендринскэй.
Источник: UlusMedia