678670, с.Чурапча ул. Карла Маркса 19 +7(984)1182258 m.haacka@gmail.com

КЫАЙЫЫ БУОЙУТТАРЫГАР АНААН ЧУРАПЧЫТТАН ИЙЭ ДОЙДУЛАРЫН БУОРУН ИЛДЬЭ АЙАННААТЫЛАР

Улуу Кыайыы 75 сылын көрсө Чурапчы улууһугар дьоһун дьаһаллар ыытыллаллар. Ол курдук бүгүн, алтынньы ыйын 6 күнүгэр, Аҕа дойду Улуу сэриитин кыттыыллааҕа Иван Михайлович Павлов аатынан Чурапчы орто оскуолатын дириэктэрэ Михаил Дьячковскай көҕүлээһинэн, оскуола иһинэн тэриллибит патриотическай клуб 12 иитиллээччитэ, хамандыыр Саша Сергеев уонна оскуола историяҕа учуутала Василий Макаров салайааччылаах Новгородовскай уобалас Старорусскай бөһүөлэгэр көттүлэр.

Чурапчы нэһилиэгин оскуолаларыттан Иван Павлов аатынан Чурапчы орто оскуолата оҕону патриотическай иитиигэ биир бастыҥнар истэригэр сылдьар. Уолаттар байыаннай олоххо бэлэмнээх буолууларыгар оскуола физкултуураҕа учуутала Александр Оконешников уонна Ил Түмэн дьокутаата, Иван Павлов аатынан “Албан аат” мусуой салайааччыта, саппаас капитана Семен Никитин кыһамньылара, болҕомтолоро баһылыыр-көһүлүүр оруолу ылбыта. Ол курдук бу байыаннай клуб улуус иһинээҕи бойобуой дьайыылар бэтэрээннэрин бириистэрин хас да төгүллээх кыайыылаахтара уонна “Снежнай барс” байыаннай көрүү эмиэ кыайыылаахтара, призердара.

Уолаттар маҥнай Старорусскай бөһүөлэккэ турар байыаннай чаас казарматыгар уон хонук олоруохтара. Манна дьиҥнээхтии саллаат уустук сулууспатыттан кылгастык үөрэтиэхтэрэ, байыаннай үөрэҕи ааһыахтара. Ол кэннэ Ильмень күөлгэ кыргыһыыга анаан Устрек диэн сиргэ туруоруллубут Саха буойуттарын (стрелкам) обелиһыгар сибэкки дьөрбөтүн ууруу сиэригэр-туомугар кыттыахтара уонна Чурапчы нэһилиэктэрин барытыттан хомуллубут ийэ буору кутуохтара.

  

Ханнык баҕарар саллаакка төрөөбүт Ийэ дойдутун буора туохтааҕар даҕаны күндү. Биһиги буойуттарбыт Ильмень күөл кыргыһыытыгар хорсуннук кыргыспыттара! Ол онон биһиги кинилэри Кыайыы саллааттара диирбит оруннаах.

  

Ааптар: Семен Жендринскэй.

Источник http://ulus.media/2019/10/06/kyajyy-buojuttarygar-anaan-churapchyttan-ije-dojdularyn-buorun-ilde-ajannaatylar/