678670, с.Чурапча ул. Карла Маркса 19 +7(984)1182258 m.haacka@gmail.com

ЧУРАПЧЫ УЛУУҺУН ЫЧЧАТА УСПУОРТ ТУРИЗМЫГАР КҮРЭХТЭСТЭ

 
 

Балаҕан ыйын 21 күнүгэр Алаҕар нэһилиэгэр „ТУРИЗМ-2019“ улуустааҕы ыччат бэстибээлэ бэрт тэрээһиннээхтик буолла. Бэстибээл иһинэн ыспартыыбынай туризмҥа, гитаранан ырыаҕа уонна кутаа оттон миин буһарыытыгар күрэхтэһиилэр ыытылыннылар.

Тыҥааһыннаах күрэх түмүгүнэн туризмҥа бастакы миэстэни Алаҕар иккис хамаандата, иккис миэстэни Алаҕар бастакы хамаандата, үһүс миэстэни „S.A.A.S“ Чурапчы нэһилиэгин ыччатын сэбиэтин хамаандата ыллылар. Кыайбыт хамаандалар 20, 15, 10 тыһыынча суумалаах сэртипикээттэринэн наҕараадаланнылар. Асчыттар куонкурустарыгар Виктор Илларионов (Чурапчы) кыайан, 2000 суумалаах сэртипикээти тутта. Оттон гитара күрэҕэр Энесса Соколова (Чурапчы) кыайан, 1000 суумалаах сэртипикээтинэн наҕараадаланна.


Калерия Борисова, Алаҕар нэһилиэгин ыччатын исписэлииһэ:
«2019 сылга Алаҕар нэһилиэгэр Ыччат сыла биллэриллибитэ. Бу чэрчитинэн элбэх үлэ көхтөөхтүк ыытылынна. Быйыл Өрөспүүбүлүкэ үрдүнэн түөрт нэһилиэк Ыччат сылын биллэрбитэ. Кинилэри кытары ыкса ситимнээхтик үлэлэһэбит. Ол курдук, саас хаста да көрсүһэн, араас күрэхтэһиилэри, тэрээһиннэри ыыппыппыт. Туризм туһунан этэр буоллахха, улуустааҕы граны кыайаммыт, ыыттыбыт. Аан бастаан, «Түөлбэ» уопсастыбаннай түмсүүнү (бэрэссэдээтэл Екатерина Попова) кытары кэпсэтэн, мунньахтаан, туризм туһунан бырайыагы толкуйдуохха, айыахха диэн оҥорбуппут. Бэстибээлбит былаанынан саас буолуохтаах этэ, тоҕо диэтэххэ, манна кыайбыт хамаанда «Табыс» өрөспүүбүлүкэтээҕи форумҥа туризм хайысхатыгар кытта барыахтаах этэ. Онтукайбыт, хомойуох иһин, суол-иис, тырааныспар боппуруоһугар кыһалҕалар үөскээннэр, улуустааҕы ыччат исписэлииһин Иван Пономаревы кытары сүбэлэһэн, күһүн тэрийэргэ быһаарбыппыт. Хата, бүгүн күммүт тыкта, ардах-хаар түспэтэ. Күрэхтэһиибит бэйэбит күүппүппүт, санаабыппыт, баҕарбыппыт курдук табылынна. Ким даҕаны эчэйбэтэ, барыта этэҥҥэ ааспытыттан олус үөрдүм. Ыспартыыбынай туризм ыстаансыйаларын убаастыыр учууталбыт Василий Пахомов сүбэтинэн-аматынан толкуйдаабыппыт, оҥорбуппут. Кини сүрүн судьуйабыт буолбута.

 

Аиза Копылова, Чурапчы нэһилиэгин ыччата:
«Алаҕар нэһилиэгэр ыытыллар туристическай сүлүөккэ кэлбиппиттэн астынным. Эрдэ оскуолаҕа үөрэнэ сылдьан туризм күрэҕэр кытта сылдьыбытым. Ол кэнниттэн бу бастакы сырыым буолар. Бу күрэх ыстаансыйалара ыарахаттар, ол эрээри барытын ситиһиилээхтик туораатыбыт. Саамай уустук мэһэйинэн быаны атахпытынан кууһан, илиибитинэн хааман, аппаны туораабыппыт буолла. Киһи ордук илиитэ сылайар эбит.
«Туризм-2019» улуустааҕы бэстибээл инникитин да ыытылла турарыгар баҕарабын. Маннык хабааннаах тэрээһиннэр чөл олоҕу, успуорду тарҕатар, ыччаты түмэр, сайдарга саҥа кыахтары үөскэтэр уонна саҥа доҕоттору бэлэхтиир».

Ити курдук, Алаҕар нэһилиэгэр ыытыллыбыт «ТУРИЗМ-2019» бэстибээлгэ улууспут актыыбынай позициялаах ыччата сүүрэн-көтөн, эттэрин-хааннарын чэбдигирдэн, дуоһуйа сынньаннылар.

Ааптар: Марфа ПЕТРОВА

Источник: http://ulus.media/2019/09/28/churapchy-uluu-un-ychchata-uspuort-turizmygar-k-rehteste/

Добавить комментарий


Защитный код
Обновить

Наши партнеры