678670, с.Чурапча ул. Карла Маркса 19 +7(984)1182258 m.haacka@gmail.com

МУГУДАЙГА САҤА ТЕХНОЛОГИЯНАН ҮӨРЭНЭР КИИН АҺЫЛЫННА

 

Балаҕан ыйын 24 күнүгэр Д.Д. Красильников аатынан Мугудайдааҕы орто оскуола баазатыгар аныгы үйэҕэ олус наадалаах “Точка роста» диэн цифровой уонна гуманитарнай хайысхалары үөрэтэр киин үөрүүлээх аһыллыыта буолла.

Бу дьаһал бүтүн Арассыыйа үрдүнэн биир бириэмэҕэ интэриниэт көмөтүнэн, биир ситимҥэ холбонон ыытылынна. Ол эбэтэр, тута сибээс нөҥүө дойду араас регионнара бэйэлэрин уратыларын, ИТ-технология эйгэтигэр туох саҥа сүүрээннэр киирбиттэрин кылгастык билиһиннэрдилэр. Маны тэҥэ «Точка роста» киин олоххо киирэн, үөрэнээччилэргэ элбэх саҥа кыаҕы биэрэрин сырдаттылар.  Информатика, обж, технология уруоктара олох атын ньыманан ыытыллар буолалларын бэлиэтээтилэр.  Эбии үөрэхтээһин өттүгэр эмиэ усулуобуйа тэриллэр эбит. Маныаха оскуолаҕа анал кабинеттар, оҕолор идиэйэлэрин олоххо киллэрэллэригэр аныгы тэриллэр бааллар.

Ол курдук, Мугудай орто оскуолатыгар информатика предметигэр  саҥардыллыбыт көмпүүтэрдэр, ноутбуктар, интерактивнай комплекстар, оттон ОБЖ предметигэр бастакы суһал көмөнү оҥорорго аналлаах аныгылыы тренажер-манекеннар кэлбиттэр. Технология  предметигэр цифровой хайысха көмпүүтэринэй черчениятыгар «3D-моделирование“ тэриллэрэ, ЗД-принтер, квадрокоптердар уо.д.а. үрдүк кыамталаах медиа-тэриллэр кэлиэхтээхтэр.  Маны таһынан кабинеттарга анал дизайн-макетынан өрөмүөннэр ыытыллыбыттар.

Бэлиэ түгэҥҥэ Мугудай орто оскуолатын аактабай саалатыгар маҥан өҥнөөх анал путбуолкалаах үөрэнээччилэр, учууталлар муһуннулар. Дьаһал Арассыыйа уонна Саха сирин гимнэрин истиилэриттэн  саҕаланна.

 

Дьаһал үөрүүлээх чааһыгар улуус баһылыгын экономикаҕа уонна инвестиция боппуруостарыгар солбуйааччы Алексей Егоров эҕэрдэ тылы эттэ: ««Аныгы оскуола» федеральнай бырайыак иһинэн, «Точка роста» диэн киин оҥоһуллан, бүгүн биһиги улууспутугар С.А.Новгородов аатынан Чурапчы орто оскуолатыгар уонна Мугудай орто оскуолатыгар үөрүүлээх аһыллыылара буолла. 2019 сылга бүтүн Арассыыйа үрдүнэн уопсайа 2049 оскуолаҕа маннык кииннэр тэрилиннилэр. Олортон биһиги өрөспүүбүлүкэбитигэр 54 оскуолаҕа киирдэ. Бу киин нэһилиэнньэ цифровой хайысхаҕа үөрэхтээх буоларыгар, ыраах нэһилиэктэр үөрэнээччилэрэ бүтүн Арассыыйаны, өрөспүүбүлүкэни кытары тэҥ сайдыылаах, тэҥ хаачыстыбалаах  билиини иҥэринэллэригэр көмө буолар»,- диэтэ.

Салгыы Мугудай нэһилиэгин баһылыга Кузьма Пермяков эҕэрдэлээн туран,  «олус улахан үчүгэй бырагыраама биһиги оскуолабытыгар киирдэ“ диэн бэлиэтээтэ. Мугудай орто оскуолатын дириэктэрэ, СӨ үөрэҕириитин туйгуна Иннокентий Юмшанов кэтэһиилээх тэрээһиннэрэ саҕаламмытынан эҕэрдэлээтэ. Итиэннэ уруоктар аныгылыы технология көмөтүнэн ыытыллалларын сырдатта: «Учууталлар информатика, ОБЖ, технология предметтэригэр, эбии үөрэхтээһин дьарыктарыгар саҥа  технологиялары, ньымалары туттан, оҕолорго саҥа билиилэри биэриэхтэрэ. Ол курдук, технология уруогар урут маһынан кыһан араас оҥоһуктары, дуоскалары оҥорор буоллахпытына,  билиҥҥи үөрэнээччилэр барыта цифровизация хайысхатынан 3Д- моделировние бырагырааманан оҥоһуктары оҥорорго үөрэниэхтэрэ. Онон инникитин бу эйгэҕэ “Ворлдскилс”, “Джуниорскилс” курдук чөмпүйэнээттэргэ ситиһиилээхтик кыттыыны ылыахпыт диэн эрэнэбит». Салгыы улуустааҕы үөрэх салалтатын начаалынньыгын солбуйааччы Анастасия Осипова эҕэрдэлээтэ. Улууска үөрэх хаачыстыбата тупсарыгар өссө биир хардыы оҥоһуллубутун бэлиэтээтэ.

Үөрүүлээх дьаһалга  мустубут үөрэнээччилэргэ, учууталларга, ыалдьыттарга Ангелина Сивцева уонна «Хатыҥчаана“ бөлөх  (сал. Евдокия Охлопкова) ылбаҕай ырыаларын бэлэхтээтилэр.

Ити кэнниттэн киини  аһар аалай лиэнтэни улуус баһылыгын экономикаҕа уонна инвестиция боппуруостарыгар солбуйааччы  Алексей  Егоров, Мугудай нэһилиэгин баһылыга Кузьма Пермяков, оскуола дириэктэрэ Иннокентий Юмшанов, технология учуутала Артем Чемпосов уонна 6-с кылаас туйгун үөрэнээччитэ Стас Оконешников үөрүүлээх түгэҥҥэ  быстылар.

 

Салгыы икки кылааһынан (обж, информатика предметтэригэр) үөрэнээччилэргэ аһаҕас уруоктар ыытылыннылар.

 

Ити курдук, улууспут үөрэнээччилэрэ аныгы олоххо эппиэттиир саҥа ньымалары, технологиялары үөрэхтэригэр туһанан, сайдыылаах дойду үөрэнээччилэрин кытта тэҥҥэ үөрэх-билии киэҥ аартыктарын арыйыахтара, үрдүк чыпчаалларын дабайыахтара.

 

Ааптар: Марфа ПЕТРОВА.

Источник: http://ulus.media/2019/09/25/mugudajga-sa-a-tehnologiyanan-rener-kiin-a-ylynna/

Добавить комментарий


Защитный код
Обновить

Наши партнеры