678670, с.Чурапча ул. Карла Маркса 19 +7(984)1182258 m.haacka@gmail.com

ЧУРАПЧЫ СҮҮРҮК АТТАРЫН ТУҺУНАН САҤА КИНИГЭ ТАҔЫСТА

 
 

„Айылгы“ култуура уонна духуобунай сайдыы киинигэр Г. С. Платонов „Чурапчы сүүрүк аттара“ диэн кинигэтин сүрэхтэниитэ буолла. Бу дьаһалга Чурапчытааҕы ат успуордун федерациятыттан (сал. Н. А. Аржаков), улуус, нэһилиэк дьаһалталарыттан, араас кэмнэргэ ат баайыытыгар тириэньэрдээбит дьон, сүүрдүбүт жокейдар, ат сүүрдүүтүн энтузиастара, билигин бу көрүҥү сайыннарыыга үлэлии сылдьааччылар сырыттылар.

Герасим Степанович Платонов –  Чурапчы нэһилиэгин Бочуоттаах гражданина, Россия потребкооперациятын туйгуна, „Россия потребкооперацията сайдыытыгар киллэрсибит кылаатын иһин“ уордьан кавалера, „Маарыкчаан“ потребуопсастыба Бочуоттаах бэтэрээнэ, успуорт бэтэрээнэ, „Саха Өрөспүүбүлүкэтигэр физическэй култуураны уонна успуорду сайыннарыыга киллэрсибит кылаатын иһин“  бэлиэ, „Улуус социальнай-экономическай сайдыытыгар  киллэрсибит кылаатын иһин“ 2-с истиэпэннээх анал бэлиэ хаһаайына, Афанасий Кирикович Софронов  аатынан ыспартыыбынай бириэмийэ лауреата, Чурапчы интэринээт-оскуолатын Бочуотун кинигэтигэр киллэриллибит, Россия суруналыыстарын сойууһун чилиэнэ. Кини Муоратааҕы байыаннай  флокка сулууспалаабыта, бастакы ыстатыйалаах старшина, „В. И. Ленин төрөөбүтэ 100 сылын туолуутугар уһун походка устуу иһин“ жетоннаах. Үрдүк үөрэхтээх. Новосибирскайдааҕы эргиэн үнүстүүтүн үөрэнэн бүтэрбитэ. Идэтинэн араас салайар үлэлэргэ сылдьыбыта, 10 сыл Чурапчы улууһун эргиэнин салайбыта. 10 оҕо амарах аҕата.

Герасим Степанович –улуустааҕы бэтэрээн-ыспартысымыаннар сэбиэттэрин бэрэссэдээтэлэ, Чурапчы нэһилиэгин ытык Сүбэтин чилиэнэ, Муоратааҕы байыаннай флокка сулууспалаабыттар түмсүүлэрин салайааччыта.

Кини успуорт тиэмэтигэр элбэхтик суруйар. Улууспут хаһыатыгар „Саҥа олоххо“, „Саха сирэ“, „Кыым“, „Спорт Якутии“ хаһыаттарга, сурунаалларга бу тиэмэҕэ суруйуулара бэчээттэннилэр. Улууспут успуордун устуоруйатын киэҥник сырдатар, „Чурапчы—успуорт туоната“ диэн икки туомнаах кинигэ тахсыытыгар  ааптардартан биирдэстэрэ. „Чурапчы теннисчиттэрэ“, „Чурапчы волейболистара“, „Кинилэр Чурапчыны аатырдыбыттара“ кинигэлэрдээх. Итини таһынан успуорка аналлаах альбом-кинигэни бэчээттэппитэ, 2005 сылтан көһө сылдьар фото-быыстапката элбэх нэһилиэктэргэ, тэрилтэлэргэ туруорулунна.

Успуорду таһынан араас хайысхаларга эмиэ суруйар. „Чурапчылар –муоратааҕы байыаннай флокка“, „Эдьиийдэрим барахсаттар“, „Оҕо сааспыт биһигэ—интэринээт-оскуолабыт“, „Д. Ф. Дьячковскай“ кинигэлэр ааптардара, „Чурапчылар перископ аннынан“, „Холбос 100 сыла“ альбомнар ааптардара. Үйэтитиигэ үлэлэһэн, Чурапчы улууһун эргиэнэ сайдыытын көрдөрөр мусуойу тэрийсиигэ үлэлээбитэ.

Кинигэ сүрэхтэниитин иилээн-саҕалаан ыыппыт „Саҥа олох“ хаһыат отделын эрэдээктэрэ  А. М. Слепцов кинигэ тутулун билиһиннэрдэ. „Чурапчы сүүрүк аттара“ кинигэ Дьокуускайга „Дани-Алмас“ хампаанньа аһаҕас акционернай уопсастыба типографиятыгар 16 бэчээтинэй илиис форматтаах 132 страницалаах бэчээттэнэн таҕыста. Үрдүк хаачыстыбалаах мелованнай кумааҕыга элбэх өҥнөөх уонна өҥө суох хаартыскалардаах оҥоһуллубут. Көмпүүтэргэ таҥыытын, дизайнын Иннокентий Иннокентьевич Окоемов оҥорбут. Бэчээттэнэн тахсыытын „Чурапчы“ ТХПК үбүлээбит.

Саҥа кинигэ туһунан киэҥ кэпсэтии буолла. Тыл эппит дьон Герасим Степанович Чурапчыга успуорт сайдыытын сырдатыыга элбэхтик суруйарын, систиэмэлээхтик үлэлиирин бэлиэтээтилэр. Биһиги улууспутугар ат сүүрдүүтүн туһунан элбэх хаартыскалаах, докумуоннарга олоҕурбут ахтыылардаах бу бастакы кинигэ буоларын эттилэр.  Сүүрүк аттарбыт барахсаттар күлүмэх сүүрүүлэрин, кыайыы кынаттаммыт өрөгөйдөрүн  киинэҕэ устубуттарын экраҥҥа көрдөрбүттэригэр тэҥҥэ ыалдьа, үөрэ-көтө олордубут. Улуустааҕы ат успуордун федерациятын салайааччы Николай Аржаков  бу кыайыылар улууспут бар дьонун  өйөбүлүнэн ситиһиллибиттэрин этэн туран тириэньэргэ Дмитрий Осиповка, сүүрдээччигэ Анатолий Куличкиҥҥа, аттары көрүүгэ-харайыыга үлэлэһээччилэргэ махтанна, инникитин  ситиһиилэр өссө кэлэ туралларыгар, онуоха  бу кинигэ өйөбүл-тирэх буоларыгар эрэнэрин биллэрдэ.

Герасим Степановичка улуус, Чурапчы нэһилиэгин салалталарын, Тыа хаһаайыстыбатын управлениетын, улуустааҕы бэтэрээннэр Сэбиэттэрин,  суруналыыстар сойуустарын Чурапчытааҕы салаатын, о. д. а. Махтал суруктарын, бэлэхтэрин туттардылар.

Ааптар: Алексей СЛЕПЦОВ.

Источник: http://ulus.media/2019/09/24/churapchy-s-r-k-attaryn-tu-unan-sa-a-kinige-ta-ysta/

Добавить комментарий


Защитный код
Обновить

Наши партнеры