Чурапчы улууһугар үгэскэ кубулуйбут Бүтүн Россиятааҕы “Кросс Наций” сүүрүү күнэ буолла. Нэһилиэнньэни чөл олоххо, физкултуураҕа уонна успуорка  көҕүлүүр, эти-хааны чэбдигирдэргэ туһуламмыт дьаһал “Боотур Уус” стадиоҥҥа ыытылынна. Бу күн оскуолалар икки ардыларыгар күһүҥҥү кросска тэҥинэн күрэхтэстилэр.

Сүүрүү күнүгэр Чурапчы тэрилтэлэрин тахсан кыттыылара  быйыл тоҕо эрэ сэмэй. Аахсыйа кыттыылаахтарын, эдэр сүүрүктэри улуус дьаһалтатын социальнай управлениетын начаалынньыга Мария Заболоцкая, улуустааҕы үөрэх управлениетын  отделын исписэлииһэ Иван Лукин о.д.а. эҕэрдэлээтилэр.

Бу күн үлэ, успуорт бэтэрээнин, сүүрүүгэ уһун дистанцияларга улуус, өрөспүүбүлүкэ рекордсменын, чөмпүйүөнүн, призерун, физкултуура учууталынан 25 сыл устата ситиһиилээхтик үлэлээбит, хас да көлүөнэ физкултуура учууталларын уһуйан таһаарбыт  Илья Андреевич Тарабукины үбүлүөйдээх 60 сааһын туолбутунан үөрүүлээх быһыыга-майгыга чиэстээтилэр. Успуорт бэтэрээнэ Илья Андреевич үөрэнээччилэри физкултууранан  утумнаахтык дьарыктанарга, успуорду таптыырга ыҥырда, сүүрүүгэ үрдүк түмүктэри ситиһэллэригэр, үчүгэйдик үөрэнэллэригэр баҕарда уонна  “Күһүҥҥү кросска” уһун дистанцияларга кыайбыт эдэр сүүрүктэргэ сэмэй бэлэхтэрин туттарда.

Итини тэҥэ соторутааҕыта Тамбов куоракка ыытыллыбыт Россиятааҕы үлэһиттэр 5-с  ыспартакыйаадаларыгар кыттан, кыайыы көтөллөнөн кэлбит Арчын, Надежда, Василий Лукиннар дьиэ кэргэннэрин чиэстээһин буолла. Кинилэргэ улуустааҕы үп управлениетын начаалынньыгын солбуйааччы Егор Сухаринов үрдүк ситиһиилэринэн эҕэрдэлээн туран, улуус дьаһалтатын аатыттан махтал суругу, өйдөбүнньүк бэлэҕи туттарда. Лукиннар дьиэ кэргэттэрэ кросс кыттыылаахтарыгар анаан эти-хааны уһугуннарар  хамсаныылары  көрдөрдүлэр.

Салгыы оскуола бастакы кылааһын үөрэнээччилэриттэн саҕалаан, үрдүкү кылаастарга диэри, саастарынан уонна дистанцияларынан  арахсан, хас да түһүмэхтээх эстафетаҕа сүүрдүлэр. Кыайыылаахтар грамотанан, өйдөбүнньүк бэлэхтэринэн наҕараадаланнылар.

Төһө да былыттаах, тымныы күн турдар, сүүрүктэр онтон толлубакка, тэппит атахтарын кубулуппакка, ыалдьааччыларын хаһыыларыттан тэптэн биэрэ-биэрэ илин-кэлин түһүстүлэр.  Биэтэги урут булбуттар өрөгөй үөрүүтүн биллилэр.

Ааптар: Анна ЗАХАРОВА.  

Источник: http://ulus.media/2019/09/24/churapchyga-s-r-k-n-ger-eti-haany-chebdigirtiler/