678670, с.Чурапча ул. Карла Маркса 19 +7(984)1182258 m.haacka@gmail.com

ЧУРАПЧЫ ЭБЭҔЭ ХАРБААҺЫҤҤА УОННА ТЫЫНАН УСТУУГА БАСТЫҤНАРЫ БЫҺААРДЫЛАР

Чурапчы нэһилиэгин күннэрин чэрчитинэн быйыл аан бастаан ууга харбааһыҥҥа күрэхтэстилэр. Күһүн кэлэн, уу балай да тымныйбыт кэмигэр маннык күрэх буолара дьону-сэргэни сэргэхситтэ, хайа эр санаалаах эр бэртэрэ илин былдьаһалларын көрүөн баҕалаах элбэх буолла. Харбааһыны кытары тыынан устуу интэринээт-оскуола томторугар үнүстүүт устудьуоннарыгар  анаан саҥа тутулла турар таас дьиэ анныгар, Чурапчы күөлүгэр ыытылынна.

ХАРБААҺЫН  КҮРЭҔЭР

Бу күрэххэ кыттарга 5 киһи суруйтарда. Кылаабынай судьуйа Михаил Степанов күрэхтэһии быраабылатын быһааран биэрдэ. Харбааччылар ууга пенопласт быстаҕастарынан субуруччу тардыллан оҥоһуллубут анал былаһааккаҕа 50-ча миэтэрэҕэ ууга харбыахтаахтар. Анал флажоктор бааллар. Уолаттар аргыый ууга киирэн стартыыр бэлиэҕэ харбаан тиийдилэр. Онно сэрэбиэйинэн талбыт дорожкаларынан араҕыстылар.

Эрэһиинэ тыынан устан тиийбит старт биэрээччи судьуйалар бэстилиэттэрин тыаһа өрө хабылла түһэрин кытта, харбаан сундулуппутунан бардылар. Түргэннэрэ олус. Кытыыттан син тэйиччи буолан, бастаан, ким бастаан иһэрэ биллибэт этэ. Онтон икки уол чорбос гына түстүлэр. Бырааттыы Василий уонна Егор Кожуровтар эбит. Бастакынан Василий, иккиһинэн Егор кэллилэр. Үһүс миэстэни ылар эрийсиилээх, илин-кэлин түсүһүүлээх киирсиигэ Владислав Иванов биэтэги урут булла. Егор Кривошапкин төрдүс, Афанасий Сивцев бэһис кэллилэр. Ууга киирэллэригэр даҕаны, күрэхтэһэн бүтэн тахсалларыгар даҕаны тоҥмут быһыылара көстүбэтэ.

Бастаабыкка, бириистээх миэстэлэри ылбыттарга анал мэтээллэр, дипломнар, бириистэр туттарылыннылар.

ТЫЫНАН УСТУУГА

Маннык күрэх буолбута хаһыс да сыла. Быйыл сайын балыксыт күнүгэр эмиэ күрэхтэспиттэрэ. Буоларын курдук, күрэх үс бөлөҕүнэн саастарынан араарыллан ыытылынна.

18—35 саастаахтарга 5  ыспарсымыан кыттыыны ылла. Маннык күрэххэ мэлдьи кыттар, улууска, өрөспүүбүлүкэҕэ мэлдьи инники күөҥҥэ сылдьар Василий Степанов бу да сырыыга инники кэллэ. Иккис Иван Беляев, үһүс Гаврил Татаринов буоллулар.

36—50 саастаахтарга 3 киһи киирдэ. Маныаха дэгиттэр ыспарсымыан  Афанасий Сивцев урут фиништээтэ. Кинини кытары балайда эрийсэн баран хаалбыт Андрей Коркин иккис, Спартак Гоголев үһүс буоллулар.

51-тэн үөһээ саастаахтарга кыттааччылар үһүөлэр. Манна 80-тан тахсыбыт Егор Захаров кыттан улаханнык хаалбакка, биэтэги булан көрөччүлэри сөхтөрдө. Бастакы миэстэни Иван Пермяков, иккиһи Дмитрий Назаров ыллылар.

Муҥутуур кыайыылааҕы быһаарар күрэххэ 4 тыыһыт киирдэ. Усулуобуйалара атын—эрдэ күрэхтэспит дистанцияларынааҕар икки төгүл уһун сиргэ уһуннулар. Василий Степанов хара маҥнайгыттан инники чорбойдо.  Дистанция аҥаарыттан ордук тэҥҥэ эрийсибит Иван Пермяков иккис, Афанасий Сивцев үһүс буоллулар.

Бастаабыттарга анал мэтээллэр, дипломнар, бириистэр туттарылыннылар.

Ааптар: Алексей СЛЕПЦОВ

Источник: http://ulus.media/2019/09/13/churapchy-ebe-e-harbaa-y-a-uonna-tyynan-ustuuga-basty-nary-by-aardylar/

Добавить комментарий


Защитный код
Обновить

Наши партнеры