678670, с.Чурапча ул. Карла Маркса 19 +7(984)1182258 m.haacka@gmail.com

ЧУРАПЧЫГА ЭБЭЭ МААЙА УРАТЫ ДЬАРЫГА КИНИГЭ-АЛЬБОМҤА ТИҺИЛИННЭ

Чурапчы нэһилиэгэр үтүөнүү түстүү, дьон туһа диэн күн-түүн кыһаллан үлэлиир-хамсыыр дьон аҕыйаҕа суохтар. Олор истэригэр күннээҕи олоххо наар көрсөр киһибит Мария Иннокентьевна Дьячковская буолар. Кинини дьон-сэргэ убаастаан, таптаан Эбээ Маайа, Балыксыт Маайа диэн истиҥник ааттыыр.

Соторутааҕыта Мария Иннокентьевна кулун тутар ыйга өр сыллар усталарыгар кичэйэн уурунан, хаһыат, сурунаал матырыйаалларыттан мунньан түмпүт энциклопедическай хабааннаах кинигэ-альбомун сүрэхтээтэ. Кини сэмэй айар үлэтин тута бэлиэтии көрөннөр, улуустааҕы киин бибилэтиэкэ ааҕааччыны кытары үлэҕэ отделын сэбиэдиссэйэ Марфа Кузьмина бибэлэтиэкэ дьиэтигэр бэлиэ түгэни иилээн-саҕалаан ыытта.

Чугас киһилэрин үөрүүтүн үллэстэн биир дойдулаахтара Валентина Пинигина, Евдокия Кобельянова, Антонина Перевалова, Мария Макаров, Одьулуунтан Степанида Попова, Чурапчы нэһилиэгин дьаһалтатын бэтэрээннэри кытары үлэҕэ сүрүнүүр исписэлииһэ Мария Матвеева уо.д.а. кыттыыны ылбыттара. Ытыктыыр киһибит сыралаах үлэтин уонна интэриэһинэй дьарыгын билиһиннэрбитин иһин махтанан Чурапчы нэһилиэгин баһылыга Владимир Сивцев эҕэрдэ суругун уонна сибэкки дьөрбөтүн туттарбыта.

Эбээ Маайа бэйэтэ суруйбут хоһоонноруттан кылгас композияциялары киин бибилэтиэкэ үлэһиттэрэ дорҕоонноохтук аахтылар, Наталья Захарова ылбаҕай ырыатынан кэлбит ыалдьыттары эҕэрдэлээбитэ.

Мария Иннокентьевна бу манан эрэ күннээҕи түбүгэ түмүктэммэт, кини бэйэтин баҕа өттүнэн, билигин 1-кы кыбаартал эргэ дьиэлэрин көтүрэ сылдьар туруу үлэһиттэр сылаалаах үлэлэригэр, сэниэ-күүс эбээри күнүскү астарын буһаран илдьэн буор босхо күндүлүүр. Ыарахан үлэҕэ сылдьар уолаттар махталлара муҥура суох.

Маннык күн санаалаах күндү киһибитигэр кытаанах доруобуйаны, айар-тутар үлэтигэр үрдүктэн-үрдүк ситиһиилэри баҕарабыт.

Источник: UlusMedia

Ааптар: Сэмэн Жендринскэй.

 

Добавить комментарий


Защитный код
Обновить

Наши партнеры