678670, с.Чурапча ул. Карла Маркса 19 +7(984)1182258 m.haacka@gmail.com

ЧУРАПЧЫГА “ДЭҤҤЭ ТӨРҮҮР СЭДЭХ КИҺИ” ТУРУОРУУ КИЭҤ АРАҤАҔА КӨҺҮННЭ

Чурапчы нэһилиэгин “Айылгы” норуот айымньытын дьиэтигэр саха уһулуччулаах, ССРС, РСФСР, Саха АССР үтүөлээх тириэньэрэ Дмитрий Петрович Коркин сырдык аатыгар анаан,  Аграфена Макарова аатынан Саха сиринээҕи култуура уонна искусство кыһатын 4-с кууруһун устудьуона Айтал Намытаров димпломнай үлэтинэн театрализованнай көстүү үгүс дьон биһирэбилин ылла.

Чурапчыбыт улууһун эдэр ыччата сылтан сыл аайы култуура уонна искусство үөрэҕин кыһатын ситиһиилээхтик түмүктээн, дойдуларыгар исписэлиис быһыытынан үлэлии кэлэллэрин бука бары үөрэ көрсөбүт. Бэҕэһээ, олунньу 20 күнүгэр, туруоруллубут театрализованнай көстүү режиссера Айтал Намытаров бэйэтэ маннык кэпсиир:

“Дипломнай үлэм суруллуутугар махтанар дьоммунан: үөрэнэр кыһам быраактыкатын кураатара Алексей Анатольевич Константинов, Дмитрий Коркин аатынан “Албан аат” түмэл исписэлииһэ Анна Петровна Спиридонова, Дмитрий Коркин аатынан интэринээт-оскуола дириэктэрэ Николай Николаевич Гуляев, интэринээт-оскуола дириэктэрин тэрийэр чааска солбуйааччыта Сахаайа Лаврова, “Айылгы” норуот айымньытын дьиэтин режиссера Сарыал Сивцев, институт устудьуоннара, интэринээт-оскуола уонна Семен Новгородов аатынан Чурапчы орто оскуолатын үөрэнээччилэрэ уонна театрализованнай көстүүнү туруорарбар күүс-көмө, салайааччы быһыытынан сылдьыбыт Ярослав Лебедев буолаллар. Бэҕэһээҥҥи туруоруум мин бастакы холонуум… бэйэм санаабар олус бэркэ ааста, туруорбут сыалым барыта ситиһилиннэ. Режиссер быһыытынан үлэлиир кэммэр бэйэм эппинэн-хааммынан бу эйгэ уустук үлэтин дьэ биллим диэххэ сөп. Соҕотоҕун бу маннык үлэни кыайан толорбот эбиккин диэн түмүккэ дьэ кэллим (үөрэр). Сценарийы, сюжеты, муусуканы бүтүннүү бэйэҥ таҥан туруораҕын. Артыыстары талыыга сүрүн көмөнү “Айылгы” норуот айымньытын дьиэтин режиссера Анастасия Семеновна Егорова оҥорбута.

Сүрүн оруолларга Дмитрий Петрович уобараһыгар Семен Новгородов аатынан Чурапчы орто оскуолатын учуутала Дмитрий Петрович Соловьев олус үчүгэйдик оонньоото, Роман Дмитриев – Алексей Прокопьев, Павел Пинигин – Иван Аммосов, Александр Иванов – Михаил Уаров, Николай Захаров-Сахаачча – Михаил Фомин, Дмитрий Коркин оҕо сааһа – Эдик Тихонов о.д.а.

Көстүү уопсай тутула бу уобарастар тула барар, манна Дмитрий Коркин бэйэтин түмэлигэр ылбыт матырыйааллара улахан көмө буоллулар. Үөрэхпин түмүктээн ханна аныылларынан үлэлии барар санаалаахпын уонна оттон үөрэхпин кэтэхтэн үрдэтинэр былааннаахпын”.

Көрөөччүлэр ортолоругар Дмитрий Петрович биир бастыҥ иитиллээччитэ, оҕолорго көҥүл тустууга бастакы Аан дойду чөмпүйэнээтин боруонса призера, СССР успуордун маастара, Арассыыйа физическэй култуураҕа уонна успуорка, уопсай үөрэхтээһиҥҥэ туйгуннара, Чурапчы улууһун Бочуоттаах олохтооҕо Семен Прокопьевич Макаров: “Эдэр режиссер туруоруута үчүгэй, уотун-күөһүн бэркэ таппыттар. Улаханнык убаастыыр тириэньэрбит Дмитрий Петрович олоҕун-айар үлэтин төһө кыалларынан сырдата сатаабыттар”, – диэн санаатын үллэстэр.

Үүнэр иһэр талааннаах режиссер уолбутугар Айталга өссө да инникитин таһаарыылаах үлэни, саҥаттан-саҥа интэриэһинэй туруорууларынан дьонун-сэргэтин үөрдэ турарыгар баҕарабыт.

Ааптар: Сэмэн Жендринскэй. Николай Гуляев хаартыскаҕа түһэриилэрэ.  

Добавить комментарий


Защитный код
Обновить

Наши партнеры