678670, с.Чурапча ул. Карла Маркса 19 +7(984)1182258 m.haacka@gmail.com

ЧУРАПЧЫ КҮННЭРЭ АММА УЛУУҺУГАР

 
 

Олунньу 6 күнүгэр Чурапчы улууһун Аҕа баһылыга Андрей Ноговицын салайааччылаах 150 киһилээх делегация ыаллыы сытар Амма улууһугар Чурапчы күннэрин тэрийдэ. Бииргэ үлэлииргэ, бэйэ-бэйэни өйөһөргө сөбүлэҥ түһэрсэн кэллэ.

Чурапчы улууһугар быйыл “Тыа хаһаайыстыбатын” сыла биллэриллибитэ. Ол чэрчитинэн дэлэгээссийэ Абаҕатааҕы уонна бастыҥ ыанньыксыт А.Е. Сутакова аатынан Бөтүҥнээҕи сүөһү көрөр комплекстарга сырытта, үлэ-хамнас хайдах ыытылларын, төһө сүөһүнү көрөн-истэн олороллорун билистэ.

 

Ити кэннэ саҥа тутуллан үлэҕэ киирбит Н.Е. Иванов аатынан Бөтүҥ орто оскуолатыгар итиэннэ И.Н. Емельянов аатынан аһы-үөлү оҥорон таһаарар комплекс үлэлэрин көрдө-иһиттэ. Амма нэһилиэгэр тиийэн Аҕа баһылык Николай Архипов хас даҕаны хайысханан үлэлии олорор бизнес-инкубатор уонна стадион уораҕайын баазатыгар оҕону дьарыктыыр ыспартыыбынай оскуола үлэһиттэрин кытары билиһиннэрдэ.

 

Ити бириэмэҕэ Ф.Ф. Потапов аатынан култуура дьиэтигэр “Чурапчы” ТХПК бородууксуйатын Амма улууһун олохтоохторо хото атыыластылар. Чурапчы улууһун үөрэҕин систиэмэтин үлэһиттэрэ, норуот маастардара кыттыылаах быыстапканы дьон-сэргэ улаханнык сэргээн, сөҕөн-махтайан туран көрдө. Итини таһынан улууспут талба талааннаахтара Ольга Седалищева, Изабелла Кузьмина, Наталья Иванова, Айаана Иванова о.д.а. ыыппыт маастар- кылаастарыгар сүүһүнэн киһи кэлэн дьарыктанна, билиилэрин-көрүүлэрин хаҥатта.

Амма улууһун дьаһалтатын мунньахтыыр саалатыгар төгүрүк остуолга Амма улууһун дьокутааттарын Сэбиэтин бэрэссэдээтэлэ Софья Александрова, Амма улууһун Чакыр нэһилиэгин баһылыга Прокопий Прокопьев уонна Мырыла нэһилиэгин баһылыга Мария Кронникова сүрүн иһитиннэриилэри оҥордулар. Улуус баһылыга Николай Архипов Чурапчы улууһун баһылыга Андрей Ноговицын этиитин толору өйүүрүн, урукку устуоруйаны умнубакка Боотуруускай улууһу ахтан-санаан, кэлэр 2023 сылга дьоҥҥо-сэргэҕэ тиийимтиэ гынан бэлиэтииргэ диэтэ. Баһылыктар хардары-таары табыгастаах үлэни-хамнаһы ыытар туһунан сөбүлэҥ баттастылар.

Амма улууһугар Чурапчы күннэрин түмүктүүр чааска улуус баһылыга Николай Архипов: “Чурапчылар былааһы ыллылар! Быыстапкаларын көрөн улаханнык сөхтүбүт, үөрэх таһыма Чурапчыга хайдахтаах курдук үөһэ таһымҥа тахсыбытын илэ харахпытынан көрдүбүт. Саҥалыы технологиялары баһыйа туппуттара сөхтөрдө. Ас-үөл дьаарбаҥката эмиэ олус үрдүк таһымҥа ааста. Боотуруускай улуус устуоруйатын үйэтитэн, ол онно аналлаах дьаһаллары ыытарга сөбүлэҥ түһэристибит”, – диэн үрдүк сыанаттан тыл эттэ.

 

Чурапчы улууһун Аҕа баһылыга Андрей Ноговицын: “Биһиги улуус Нерюнгри куораты кытары 40 сыл анараа өттүттэн, ыаллыы сытар Таатта улууһун кытары 2014 сыллаахтан саҕалаан доҕордуу сыһыаны үөскэтэн бэйэ-бэйэбитин өйөһөн ыкса үлэни ыыта олоробут. Оттон бүгүн өҥ буордаах Амма улууһугар кэлэн турарбытыттан уонна кэлбит делегацияны Амма улууһун дьоно-сэргэтэ истиҥник көрсүбүккүтүгэр дириҥник махтанабын. Амма улууһун кытары инникитин даҕаны дириҥ ис хоһоонноох дьаһаллар ыытыллыахтара”, – диэтэ. Салгыы улуус уус-уран самодеятельноһа кыттыылаах эҕэрдэ кэнсиэрэ уонна П.М. Решетников аатынан Чурапчытааҕы норуодунай тыйаатыр Чингиз Айтматов айымньытынан “Ийэ Сирэ” испэктээк (режиссер Иван Бушков) туруорулунна.

Онон кэлэр 2023 сылга Боотуруускай улуус төрүттэммитэ 385 сылын Амма, Таатта улуустарын кытары холбуу ыытыллара былааҥҥа киирдэ.

Сэмэн Жендринскэй.    

Добавить комментарий


Защитный код
Обновить

Наши партнеры