Бэҕэһээ, тохсунньу 5 күнүгэр, Чурапчы улууһугар улахан үөрүүлээх сонун кэллэ. Биир дойдулаахтара Баһылай Лукин “Тымныы полюһа” норуоттар икки ардыларынааҕы экстремальнай марафоҥҥа, Өймөкөөнтөн Томторго диэри 42 км 195 миэтэрэни 3 чаас 32 мүнүүтэнэн бастакынан биэтэккэ кэлэн кыайыылаах үрдүк аатын ылла!

Бу марафон Саха сиригэр иккис төгүлүн ыытыллар, быйылгы сүүрүү Улуу Кыайыы 75 сылыгар ананна. Манна уопсайа 30-ча ыспарсымыан кыттыыны ылла.

Баһылай сүүрүүнэн 2000 сыллаахтан утумнаахтык дьарыктанар, билигин физическэй култуура уонна успуорт үнүстүтүүтүгэр ыспартыыбынай-байыаннай отделга таһаарыылаахтык үлэлии-хамныы сылдьар ыччаппыт буолар. Санатан этэр эбит буоллахха, Баһылай дьиэ кэргэнин кытары былырыын Тамбов куоракка ыытыллыбыт үлэ кэлэктииптэрин икки ардыларыгар Бүтүн Арассыыйатааҕы V-с ыспартакыйаадаҕа бастакы миэстэ буолбуттара. Уопсайа холбоон Лукиннар маннык улахан күрэхтэһиилэргэ дьиэ кэргэнинэн Арассыыйа үс төгүллээх чөмпүйүөннэрэ.

Төһө даҕаны сибээс куһаҕанын иһин Баһылай биһигини кытары сибээскэ тахсан санаатын үллэһиннэ: “Сүүрүү олус тыҥааһыннаахтык ааста. Маҥнай кыраадыспыт -41С көрдөрөр этэ, оттон Томторго чугаһаан истэхпит аайы улам тымныйан тэрийээччилэр биллэрбиттэринэн -45С буолбут. Бу күрэхтэһиигэ бэлэмнэнии күүскэ барбыта, бэйэм санаабар куһаҕана суох бириэмэни көрдөрдүм. Кэргэммэр Надеждаҕа, бэйэм үлэлиир кэлэктииппэр күүс-көмө, өйөбүл буолбуттарыгар дириҥник махтанабын. Тымныы полюһун чурапчылар ыллыбыт!”

Лукиннар кудук ыспартыыбынай куттаах дьиэ кэргэн баар буолан: “Чурапчы – бу успуорт туоната” диэн ааттанар. Баһылайга бэйэтигэр, кини иллээх дьиэ кэргэнигэр кытаанах доруобуйаны, дьолу, үрдүк ситиһиилэри баҕара хаалабыт.

Ааптар: Сэмэн Жендринскэй.

Источник: UlusMedia