678670, с.Чурапча ул. Карла Маркса 19 +7(984)1182258 m.haacka@gmail.com

КИЭҺЭ 21 ЧААСКА “ИЗА УОННА ЛИЗА”

Чурапчы улууһун “Саҥа олох” хаһыат кэрэспэдьиэнэ Дьокуускай куоракка олорор, үлэлиир, бу ыйтан саҕалаан көстөр “Иза уонна Лиза” сериал толорооччу продюсера, “Саха” НКИХ биэриилэрин ыытааччы Алена Анатольевна Антонованы кытары сибээскэ тахсан кэпсэттэ.

“Иза уонна Лиза” диэн эрдэҕэс саастаах оҕолорго, ыччакка аналлаах сериал. Ол эрэн бу сериалы биһиги улууспут олохтоохторо эдэрдиин-эмэнниин бука бары улаханнык сэҥээрэ көрөр буоллубут. Манна күннээҕи олохпутугар баар араас түгэннэр көстөллөр. Хас биирдии сериятын кэннэ дьон арааһы толкуйдуура үксүүр, бу оҕолору төрүүр дьиэҕэ атастаһыннарбыттара чуолкай диэн сабаҕалааһын тахсан эрэрэ көрөөччүлэри интэриэһиргэтэр.

-Алена, үтүө күнүнэн, Сахабыт сиригэр саҥаттан-саҥа, кэрэхсэбиллээх сюжеттаах сериал үксээн иһэриттэн биһиги олус үөрэбит, хайҕыыбыт. “Иза уонна Лиза” сериал сценарийын ааптарын, бу киинэни режиссердар хайдах устубуттарын, сүрүн оруолларга кимнээх оонньууларын кылгастык билиһиннэриэн дуо?

-Үтүө күнүнэн. Сценариһынан Сардаана Сивцева-Даана Сард буолар. Кини сценарийдарынан эрдэ “Ааспыт ааспат амтана” 1-2, “Сүлүһүннээх таптал” 1-2 сезоннара, итиэннэ, бу “Иза уонна Лиза” сериаллар эфиргэ тахсан дьон биһирэбилин ыллылар. Даана Сард сериал сценарийдарын суруйуутун тохтоппот, бэлэм сценарийдар эмиэ бааллар. Онон кэлэр телевизионнай сезоҥҥа тахсыахтара диэн эрэнэбит. Сценарий диэн ити биирэ, иккис саамай үлэлээҕэ киинэни уһулуу, таҥан, табан таһаарыы буолар – ити үлэ барыта режиссертан улахан тутулуктаах. Бу сериалга икки режиссер үлэлэстэ: Радомира Афанасьева уонна Саймон Сергеев. Саймон туруорааччы режиссер быһыытынан, оттон Радомира таҥан оҥорооччу режиссерунан олус үчүгэйдик тапсан үлэлээтилэр. Сериалы устар уустук, сылаалаах уонна эппиэтинэстээх үлэ, бэриллибит бириэмэҕэр турбут соругу толорор элбэх сыраны эрэйэр. Манна үлэ хаамыытын былаанныыр, артыыстар тугу гыныахтаахтарын, ханна кэлии-барыы баарын, иһитигэр-хомуоһугар тиийэ күннээҕи былааны оҥорор, сүүрэр-көтөр үлэлээх линейнэй продюсер буолар. Кинитэ суох үлэ барбат, маныаха бастыҥ линейнэй продюсербытынан Сардаана Омукованы ааттыыбыт. Оператордарынан Евгений Рязанскай, Семен Афанасьев уонна звукооператорынан Любомир Адамов үлэлэстилэр. Быйылгыттан “Саха” НКИХ телевизионнай сериаллар сулууспалара тэрилиннэ, салайааччынан Марфа Даниловна Пермякова ананан үлэ күүскэ ыытыллар, онон инникитин саҥаттан саҥа элбэх сериалы көрүөхпүт. “Иза уонна Лиза” сериалы уһулуу балаҕан ыйыттан саҕалаан алтынньыга диэри буолбута. Биһиги дьолбутугар дьылбыт арыый да уһаан, хаарбыт хата хойукка диэри түспэккэ киинэ бэркэ уһуллубута. Сцена барыта Дьокуускай куорат иһигэр буолара көстөр.

-Чурапчыттан төрүттээхтэр бааллар дииллэр. Артыыстары сүүмэрдээһин хайдах ыытыллыбытай?

-Сериалга идэтийбит артыыстартан СӨ үтүөлээх артыыһа Домна Васильевна Уйгурова (киинэҕэ Лиза эбэтэ Таисия Ивановна) уонна Александр Борисов (Гаврил) Саха тыйаатырын артыыстара оонньоотулар. Оттон атын артыыстар бэйэлэрин баҕаларынан кэлэн сүүмэрдээһини ааспыттара. Артыыстарбыт бары өрөспүүбүлүкэбит араас муннуктарыттан төрүттээхтэр, холобура Марианна оруолун оонньообут Евдокия Ефимова хоту дойду курдук ыраах сиртэн уоппускатын кэмигэр кэлэн оонньоон барыбытын сөхтөрбүтэ. Лана Хомподоева Мырылаттан төрүттээх Сайаана Саввична уонна Савва Саввич (Күндүмэн) Хомподоевтар итиэннэ Лиза Хомподоева Юлия Юрьевна уонна Юрий Саввич Хомподоевтар кыргыттара буолаллар. Кинилэри таһынан артыыс быһыытынан Чурапчыттан төрүттээх Василий Миронов кытынна.

-Сериалларга биһиги дьиҥнээх бэйэбит олохпутун көрөбүт. Салгыы туох былааннар баалларый?

-Кырдьык артыыстар бука бары олус кыһаллан туран оонньоотулар. Үгүс оонньооччулар киинэҕэ бастакы холонуулара, онон кыра сыыһалар, алҕастар баар да буоллахтарына кинилэри сэмэлээбэккитигэр көрдөһүө этибит. Аэлита оруолун толорбут Сунтаар улууһуттан төрүттээх, элбэх оҕо ийэтэ, Хатастааҕы норуот айымньытын дьиэтин режиссера Евдокия Семенова идэлээх артыыстартан туох даҕаны уратыта суох, ол да иһин буолуо режиссердар сериал аайы киниэхэ оруолу көрөллөр. Инникитин да сериаллар баар буолуохтара.

-Салаллан иһэр Саргылаах Саҥа дьылынан Чурапчы улууһун күндү көрөөччүлэригэр тугу баҕарыа этигиний?

-“Сүлүһүннээх таптал” икки сезоннара Чурапчы улууһугар уһуллубут буолан, Чурапчы дьонугар-сэргэтигэр дириҥник махтанабыт, инникитин да үлэлэһиэхпит турдаҕа. “Саха” НКИХ ханаалларын сэргээн көрөргүтүттэн үөрэбит, өссө да биһигинниин бииргэ буолуҥ диэн ыҥырабыт. Кэлэр сыл үгүс үтүө түгэннэрдээх, ситиһиилээх буоллун.

 

Кэпсэттэ Сэмэн ЖЕНДРИНСКЭЙ.

Добавить комментарий


Защитный код
Обновить

Наши партнеры