678670, с.Чурапча ул. Карла Маркса 19 +7(984)1182258 m.haacka@gmail.com

ЧУРАПЧЫЛАР СУРУТУУ КҮНҮН КӨҔҮЛЭЭТИЛЭР

Чурапчы улууһа ахсынньы 2-14 күннэригэр ыытыллар өрөспүүбүлүкэ хаһыаттарыгар чэпчэтиилээх сурутуу декадатыгар кыттыста. Бүгүн «Айылгы» култуура киинигэр Сурутуу күнэ тэрээһиннээхтик буолла.

Кондитер Наталья Иванова бородууксуйатын дьаарбаҥката, коллекционердар Надежда Захарова, Дария Федорова уонна Раиса Федорова быыстапкалара, «Бичик» кинигэ кыһатын чэпчэтиилээх атыыта, улуустааҕы бибилэтиэкэ кинигэлэрин быыстапката Сурутуу күнүн ситэрэн, киэргэтэн биэрдилэр. Онон кинилэргэ улахан махталбытын тиэрдэбит.

Тэрээһин үөрүүлээх аһыллыытын «Саҥа олох» кэрэспэдьиэнэ Марфа Петрова тойугунан арыйда. Улуус дьаһалтатын социальнай салалтатын салайааччыта Мария Заболоцкая эҕэрдэлээн туран, улуус дьокутааттарын Сэбиэтин аатыттан махтал суругу Чурапчытааҕы почта 2-с учаастагын почтальонугар Надежда Борисоваҕа, инженер-программист Александр Мишкиҥҥэ туттарда.

Ыйга биирдэ тахсар «Төрөөбүт соругум» диэн үөрэх эйгэтин сырдатар анал балаһаны таһаарар үөрэх салалтатыттан Мария Артемьева эҕэрдэ тылын, баҕа санаатын эттэ.

Почта отделениетын начаалынньыга Феодосия Слепцова Чурапчы нэһилиэгин дьаһалтатын аатыттан махтал суругу Чурапчытааҕы почта отделениетын начаалынньыгар Ольга Харитоноваҕа, 4-с учаастак почтальонугар Варвара Оконешниковаҕа туттарда. «Эрэллээх сурутааччы» диэн анал ааты  Евдокия Константиноваҕа, Егор Дьячковскайга уонна Василий Дьячковскайга анаата. Маны таһынан «Кыайыы суруга» диэн тиэмэҕэ ыытыллыбыт уруһуй куонкуруһун түмүгүн билиһиннэрдэ, үс миэстэни үһүөннэрин Дириҥ агрооскуолатын үөрэнээччилэрэ ыллылар.

«Саҥа олох» хаһыат эрэдээктэрэ Людмила Горохова алтынньы-сэтинньи ыйдарга ыытыллыбыт кэпсээн куонкуруһун кыттааччыларын наҕараадалаата. Ол курдук, Кылаан кыайыылааҕынан Кытаанахтан Мария Винокурова ааттанна. Хадаартан Сахая Никонова уонна Григорий Турантаев дьүүллүүр сүбэ биһирэбилин ыллылар. Чурапчыттан Иннокентий Алексеев уонна Анна Спиридонова туоһу суругунан бэлиэтэннилэр.

Биир идэлээхпит, «Кыым» хаһыат суруналыыһа Оксана Жиркова бэйэтин хаһыатын туһунан сырдатта, ырыатын бэлэхтээтэ.

Маны таһынан үөрүүлээх чааһы  «Үөрүү» оҕо сайдар киинин иитиллээччитэ Сандаара Михайлова «Радуга» ырыатынан (сал.  Айыына Константинова), С.А. Новгородов аатынан Чурапчы орто оскуолатын үөрэнээччитэ Сайаана Массаева «Хотугу дойдум» ырыатынан (сал. Диана Портнягина) киэргэттилэр.

 

Үгэс быһыытынан хас биирдии сурутааччы сүүйүүлээх оонньууга кыттар. Ол курдук, улуус дьокутааттара туруорбут сахалыы иһит нобуорун И. Захарова, «Бичик» кинигэ кыһата туруорбут сыаналаах кинигэтин М. Сидорова, «Айыллаан» киинэ тыйаатырыттан икки билиэти С.Ф. Макаров, почта отделениета туруорбут грилин Л. Аргунова, үөрэх салалтата туруорбут таас иһитин С. Оконешников, «Саҥа олох» туруорбут сахалыы истииллээх этажеркатын Н. Гаврильева, Чурапчы нэһилиэгин дьаһалтата  туруорбут сахалыы иһит нобуорун В. Александров, Наталья Иванова туортарын О. Окорокова, М. Петрова уонна «Кыым» хаһыат туруорбут улахан блендэрин А. Попова тутан, үөрэн –көтөн, махтанан бардылар.

     

Ааптар: Елена МАКАРИНСКАЯ.

Сэмэн ЖЕНДРИНСКЭЙ хаартыскалара.

Источник: Ulus.media

Добавить комментарий


Защитный код
Обновить

Наши партнеры