Чурапчытааҕы судаарыстыбаннай физическэй култуура уонна спорт үнүстүүтэ тэриллибитэ 20 сыллаах үбүлүөйдээх күнүн үөрүүлээх чааһа „Айылгы“ духуобунай сайдыы уонна култуура киинигэр буолла.
Саалаҕа толору мустубут дьон Арассыыйа спордун миниистирэ Павел Колобков, СӨ баһылыга Айсен Николев киириилэрин ытыс тыаһынан доҕуһуоллаатылар. Кэлбит ыалдьыттары „Чолбон“ үҥкүү ансаамбыла „Эҕэрдэ үҥкүүтүнэн“ уруйдуу көрүстэ.
Бырааһынньыктааҕы дьаһалы иилээн-саҕалаан ыытар диктор үнүстүүт сайдыытын, ситиһиилэрин саас-сааһынан билиһиннэрдэ.
Бастакынан эҕэрдэ тылы эппит Павел Колобков үнүстүүт үлэтин-хамнаһын көрөн астыммытын бэлиэтээтэ. Арассыыйаҕа физичекэй култуура уонна спорт сайдыытыгар болҕомто уурулларын, итини олоххо киллэриигэ каадырдар оруоллара улаханын, үрдүк үөрэхтээх исписэлиистэри үөрэтиигэ министиэристибэ былааннаахтык үлэлиирин эттэ. Чурапчы үнүстүүтэ биир бастыҥ үлэлээҕинэн буоларын, көрө-истэ, уопут атастаһа бүгүн бу хайысхаҕа үөрэтэр үрдүк үөрэх кыһаларын ректордара кэлбиттэрин этэн туран үлэҕэ, үөрэххэ, спорка өссө үрдүк ситиһиилэри баҕарда.
Салгыы Арассыыйа спордун министиэристибэтин наҕараадаларын туттарда. „Российскай Федерация физическэй култуураҕа уонна спорка туйгуна“ бэлиэни үнүстүүт педагогикаҕа уонна психологияҕа кафедратын сэбиэдиссэйэ Анна Данилова, гуманитарнай дьиссипилиинэлэр кафедраларын сэбиэдиссэйэ Любовь Адамова, спортивнай бэлэмнэнии кафедратын старшай преподавателэ Виктор Дьяконов туттулар. Спорт министиэристибэтин Бочуотунай грамотатынан естественнэй дьиссипилиинэлэр кафедраларын старшай преподавателэ Октябрина Шадрина, естественнэй дьиссипилиинэлэр кафедраларын старшай преподавателэ Валентина Филатова, научнай үлэҕэ проректор Светлана Гуляева наҕараадаланнылар. Миниистир Махталынан кылаабынай бухгалер Ирина Шадрина, лаборатория сэбиэдиссэйэ Эдуард Федоров, үөрэтэр-методическай отдел начальнига Евгений Коркин, спортивнай бэлэмнэнии кафедратын сэбиэдиссэйэ Василий Алексеев, физическэй култуура, спорт уонна чэбдигирдэр технологиялар факультеттарын деканын солбуйааччы Николай Сивцев, эбии профессиональнай үөрэхтээһин факультетын декана Марианна Манасытова наҕараадаланнылар.
СӨ баһылыга Айсен Николаев эҕэрдэ тылыгар үнүстүүт Саха Өрөспүүбүлүкэтин бастакы Президенэ Михаил Николаев укааһынан тэриллибитин бэлиэтээтэ. Маныаха сахалары спортивнай ситиһиилэринэн аан дойдуга тиийэ аатырдыбыт оскуола-интэринээт тирэх буолбутун, бастакы ректор Михаил Гуляев бу үрдүк үөрэх кыһата атаҕар туруутугар улахан өҥөлөөҕүн эттэ. „16-с сылын үнүстүүтү салайар Иннокентий Готовцев үөрэтии-иитии саҥа таһымыгар таһааран, уһуйаан – оскуола – үнүстүүт – профессиональнай бэлэмнээһин сибээстээх буоллулар. Дойдубут Президенэ Владимир Путин доруобай, духуобунай сайдыылаах нацияны иитиигэ соругун толорууга таһаарыылаахтык үлэлиэхтэрэ диэн эрэнэбин“, – диэтэ.
Саха Өрөспүүбүлүкэтин баһылыгын Махталынан Российскай Федерация спордун миниистирэ, спорт үтүөлээх маастара, Бочуот уордьан кавалера, „Аҕа дойдуга үтүөлэрин иһин“ 1-кы уонна 11-с истиэпэннээх уордьаннар кавалердара наҕараадаланна. Бочуотунай грамотатын үнүстүүт кафедратын салайааччытыгар Петр Гуляев туттарда. „Гражданскай килбиэн“ бэлиэнэн „Юность Москвы“ физкультурнай-чэбдигирдэр холбоһук генеральнай дириэктэрин солбуйааччы Николай Чесноков наҕараадаланна.
Российскай Федерация Федерациятын Сэбиэтин Федеральнай Мунньаҕын аграрнай-продовольственнай политикаҕа уонна айылҕа харыстабылыгар кэмитиэтин бэрэссэдээтэлин солбуйааччы Егор Борисов эҕэрдэ тыл эттэ. Үнүстүүт бастакы тэриллиитигэр утарсыылар, ыарахаттар баалларын, үп-харчы кырыымчыгынан үлэтин тохтоторго тиийэ этиилэр киирэ сылдьыбыттарын, миниистир Виталий Мутко бэрэбиэркэлии, билсэ кэлэ сылдьыбытын эттэ. Маныаха Өрөспүүбүлүкэ, улуус, үнүстүүт салалталара сөптөөх хайысханы, политиканы тутуһан бу үөрэх кыһата салгыы үлэлээбитэ, Чурапчым дьоно-сэргэтэ маныаха тирэх өйөбүл буолбуккутугар махтанабын диэтэ.
Үнүстүүт бастакы ректора, Ил Түмэн дьокутаата, эдэр ыччат дьыалаларыгар, физическэй култуураҕа уонна спорка сис кэмитиэтин бэрэссэдээтэлэ Михаил Гуляев эҕэрдэ тыл этэн туран, бу үөрэх кыһатыгар бииргэ үлэлээбит Анастасия Оконешниковаҕа, Любовь Егороваҕа, Егор Пудовка, Петр Гуляевка, Яков Оконешниковка махталын тиэртэ. Үнүстүүт үлэтигэр Арассыыйа бу хайысхаҕа үөрэтэр үрдүк үөрэҕин кыһалара көмө-тирэх буолбуттарын аҕынна.
Ил Түмэн Бочуотунай грамотатынан уонна Кыһыл көмүс чаһынан ректор Иннокентий Готовцев, Махтал суругунан Д. П. Коркин аатынан спортивнай албан аат музейын дириэктэрэ Егор Пудов, РФ үтүөлээх учуутала Любовь Егорова наҕараадаламмыттарын туттарда.
Ректордар ааттарыттан Москватааҕы судаарыстыбаннай академия ректора, Российскай студенческай сойуус президенэ Сергей Сейранов эҕэрдэ тыл эттэ.
Чурапчытааҕы судаарыстыбаннай физичекэй култуура уонна спорт үнүстүүтүн ректора Иннокентий Готовцев ыҥырыыны ылынан, үрдүк үөрэх кыһаларын ректордарыгар, Павел Колобковка, Айсен Николаевка, Егор Борисовка, бырааһынньыгы тэрийсибиттэргэ, үөрүүлээх дьаһал кыттыылаахтарыгар махтанна, кэлэктиип аатыттан салгыы таһаарыылаахтык, үрдүк көрдөрүүлээхтик үлэлииргэ эрэннэрдэ.
Улуус бары олохтоохторо үнүстүүт сайдыы саҕа саҕахтарын арыйан үүнэ-сайда, чэчирии турарыгар баҕараллар.
Автор: Алексей СЛЕПЦОВ.
Семен Жендринскэй хаартыскаҕа түһэриилэрэ.
Источник: UlusMedia