Ахсынньы 5 күнүгэр С.К. Макаров аатынан Чурапчы гимназиятыгар эр дьон учууталлар икки ардыларыгар быйыл IV–с төгүлүн өрөспүүбүлүкэтээҕи «Бастыҥ устуоруйа уонна обществознание учуутала» күрэх ыытылынна. Бу куонкурус Аҕа дойду Улуу сэриитин бэтэрээнин, РСФСР уонна САССР үтүөлээх учууталын, Чурапчы улууһун I-кы Бочуоттаах олохтооҕун Степан Кузьмич Макаров – Саха Маресьевын сырдык аатын үйэтитиигэ ананна.
Барыта сэттэ эдэр учуутал уолаттар кыттыыны ыллылар. Бу күн куонкуруһу көрө, үөрэнээччилэри кытары көрсө Арассыыйа федерациятын чилиэнэ Егор Борисов ыалдьыттаата. Маннык улахан суолталаах тэрээһиҥҥэ ыҥырбыттарыгар Егор Афанасьевич махтанна.
Кини ийэтэ Парасковья Ильинична кэргэн тахсыар диэри, Ольга, Степан Макаровтарга иитиллибит. Степан Кузьмич уопсастыбанньык, педагог быһыытынан эрэ буолбакка, кини үтүө киһи буоларын, хорсун санаалааҕын туһунан истиҥник ахтан-санаан ылла. Егор Афанасьевич учуутал уолаттары кытары иһирэхтик сэһэргэстэ. Ол курдук, бэйэлэрин билиһиннэрбиттэрин болҕойон, хайҕыы иһиттэ. Эдэр учууталлартан ханнык методиканы туттан, оҕо интэриэһин тардалларын, бэйэлэрэ туох тустаах бырагыраамалаахтарын ыйыталаста, үлэлэригэр туһалаах сүбэлэри биэрдэ. Бу күрэх үлэлэригэр-хамнастарыгар тирэх буоларыгар баҕарда.
Дэлэгээссийэ итини таһынан гимназия актыбыыс оҕолорун кытары көрүстэ. Гимназия бырабыыталыстыбатын бэрэсидьиэнэ Күннэй Макарова үөрэнээччилэр ааттарыттан тыл эттэ. Итиэннэ бибилэтиэкэҕэ анаан кинигэҕэ Егор Афанасьевичка илии баттатта.
Егор Афанасьевич оҕолор ыйытыыларыгар хоруйдаата, оҕо сааһын туһунан кылгастык сырдатта. Ол курдук, оскуолаҕа үөрэнэ сылдьан бултуурун, балыктыырын, эмиэ уол уол курдук охсуһарын, мэниктиирин туһунан оҕолор интэриэстэрин тардар гына кэпсээтэ. Кини талбыт идэлэригэр санааларын ууран, бэриниилээхтик үлэлээтэхтэринэ, ситиһиилээх уонна кыайыылаах буолалларын туһунан сүбэлээтэ. Үлэһит киһи барытын кыайар диэн эттэ. Итини тэҥэ оҕолорго уопсастыбаннай үлэттэн туора турбаттарыгар, сөбүлүүр үөрэхтэригэр киирэллэригэр, истиҥ тапталларын мүччү туппаттарыгар баҕарда. Маны барытын толордохторуна, дьоллоох киһи буолалларын бэлиэтээтэ.
Салгыы «Сахатранснефтегаз» АУо дириэктэрэ Иван Макаров бэйэтин туһунан кылгастык билиһиннэрдэ. Конкуренция сайдан турар кэмигэр, кылгас бириэмэ иһигэр элбэх билиини-көрүүнү ылыахтаахтарын, уопсастыбаҕа туһалаах дьон буоларга дьулуһуохтаахтарын туһунан сүбэлээтэ. Төрөппүттэрин, саастаах дьон олохторуттан уопут ылалларыгар, уолаттарга успуордунан дьарыктаналларыгар баҕарда.
Гимназияҕа үөрэнэр уолаттар хуордарынан куонкурус үөрүүлээх аһыллыыта саҕаланна. Арассыыйа, итиэннэ Саха Сирин гимнэрин дьаһал кыттыылаахтара сүһүөхтэригэр туран иһиттилэр. Салгыы гимназистар Степан Кузьмич туһунан литэрэтииринэй композицияны толордулар. Гимназия фойетыгар Степан Макаров айар үлэтин, олоҕун сырдатар матырыйаалларынан, хаартыскаларынан быыстапка дьон болҕомтотун тарта.
Гимназия дириэктэрэ Юрий Слепцов, улуус дьокутааттарын Сэбиэтин бэрэссэдээтэлэ Афанасий Захаров, улуус үөрэххэ салалтатын начаалынньыга Юрий Посельскай эҕэрдэ тылы эттилэр, кыттааччыларга ситиһиилэри баҕардылар. Ыччат дойдутунан киэн тутта улаатарыгар, төрөөбүт дойдутун таптыырыгар устуоруйаны үөрэтээччилэр оруоллара улаханын бэлиэтээтилэр.
Ааптар: Марфа ПЕТРОВА.
Источник: UlusMedia