Бүгүн Чурапчы улууһугар физкултуура уонна успуорт үнүстүүтэ тэриллибитэ 20 сыла. Бу үөрүүлээх күнү суолталаан, Арассыыйа успуордун миниистирэ Павел Анатольевич Колобков Чурапчы ыспартыыбынай томторугар ыалдьыттаан, үлэни-хамнаһы кытта билистэ. Кинини кытта өрөспүүбүлүкэбит Ил Дархана Айсен Сергеевич Николаев кэлбитэ оройуон успуорт туоната буоларыгар болҕомто уурулларын бэлиэтэ.
Павел Колобков бастакынан 200 миэстэлээх, 100 киһини аһатар остолобуойдаах, бу сотору үлэҕэ киириэхтээх саҥа уопсайы көрдө. Салгыы олимпийскай эрэллэри бэлэмниир интэринээт-оскуоланы уонна федеральнай таһымнаах успуорт үнүстүүтүгэр сырытта.
Интэринээт-оскуолаҕа киирээти кытта оскуола историятын, ааттаах-суоллаах выпускниктарын туһунан үөрэнээччи кэпсээтэ. Успуорт саалатыгар оскуола үөрэнээччилэрэ бары мустан туран, Павел Анатольевич киирбитигэр улуу тренер Дмитрий Коркин: «Дьол, көҥүл, норуот иһин күүс кыайарынан, сүрэх баҕатынан үөрэнэргэ сайдарга бэлэммит!” диэн девиһин доргуччу ааҕан иһитиннэрдилэр. Түмүккэ оскуола кэлэктиибин, үөрэнээччилэрин кытта уопсай хаартыскаҕа түстүлэр.
Үнүстүүккэ успуорду чинчийэр үлэ туһунан быыстапканы көрдүлэр. Быыстапкаҕа оҕону кыра сааһыттан успуорка хайдах сыһыарыахха, эрчийиэххэ сөбүн, устудьуоннарга ханнык ньымалары туһаналларын кэпсээтилэр. Устудьуоннар Сэбиэттэрэ Павел Анатольевичка Чурапчы сиригэр үктэммитинэн эҕэрдэлээн, махтанан туран, өйдөбүнньүк бэлэхтэрин туттардылар. Салгыы ректор Иннокентий Готовцев үнүстүүт генбылаанын туһунан сырдатта. Билигин ханнык объектар баалларын, инникитин тутуллуохтаах саҥа тутуулар ханан туруохтаахтарын, туох-ханнык хайысхаҕа үлэлиэхтээхтэрин сиһилии кэпсээтэ.
Биир сүрүн суолталаах түгэнинэн Саха өрөспүүбүлүкэтин уонна РФ успуордун министиэристибэтин икки ардыларыгар сөбүлэҥи түһэрсии буолла. Сөбүлэҥ ис хоһооно – өрөспүүбүлүкэҕэ физическэй култуура уонна успуорт сайдыытыгар бииргэ үлэлэһии. Манна туспа пуунунан үнүстүүт инники сайдыытын торумугар салгыы үлэлэһии киирэ сылдьар: эбии биир уопсайы, единоборство киинин тутуу курдук боппуруостар.
Павел Колобков, Айсен Николаев суруналыыстарга биэрбит интервьюларыгар бу үнүстүүт дойду үрдүнэн холобур буоларын, инникилээҕин бэлиэтээтилэр уонна үнүстүүт инники сайдыытыгар үлэлэһэргэ бэлэмнэрин эттилэр.
Ааптар: Елена МАКАРИНСКАЯ.
Семен ЖЕНДРИНСКЭЙ хаартыскаҕа түһэриилэрэ.
Источник: UlusMedia