Чурапчытааҕы судаарыстыбаннай физкультура уонна успуорт үнүстүүтүн устудьуоннара кыһа 20 сыллаах үбүлүөйүн успуорт эйгэтигэр балай да ситиһиилэрдээх көрсөллөр.
Чурапчытааҕы судаарыстыбаннай физкультура уонна успуорт үнүстүүтүн үөрэтэр үлэҕэ проректора Татьяна Колесова иһитиннэрэринэн, үс кэнники ыытыллыбыт сайыҥҥы олимпийскай оонньууларга 3 устудьуон – көҥүл тустууга Виталий Корякин, Пекиннээҕи ХХIХ олимпийскай оонньууларга (тириэньэр Скрябин М.С.), Николай Аянитов-Ноев – Лондоннааҕы ХХХ олимпийскай оонньууларга (тириэньэр Сысолятин И.М.), боксаҕа Василий Егоров – Рио-де-Жанейроҕа ХХХI олимпийскай оонньууларга (тириэньэр Пахомов А.И.) кыттыыны ылбыттара, Сардаана Трофимова (тириэньэр Жиркова Т.Ю.), Рио-де-Жанейроҕа ХХХI олимпийскай оонньууларга марафоҥҥа сүүрүүгэ путевка ылан баран, чэпчэки атлетикаҕа Арассыыйа сүүмэрдэммит хамаандатын олимпиадаҕа киллэрбэккэлэр, кыттыыны ылбатаҕа.
– Ону таһынан, эмиэ олимпийскай оонньууларга тэҥнээх бастакы интеллектуальнай көрүҥнэр аан дойдутааҕы оонньууларыгар 4 оҕобут кыттыбыта. Үнүстүүт тэриллиэҕиттэн, успуорт үрдүкү эйгэтигэр 2 успуорт үтүөлээх маастара, 3 гроссмейстер, 17 норуоттар икки ардыларынааҕы успуорт маастара, 80-тан тахса Арассыыйа, 90-тан тахса Саха өрөспүүбүлүкэтин маастардара иитиллэн таҕыстылар. Биһиги устудьуоннарбыт көҥүл тустууга, боксаҕа, буулдьанан ытыыга, чэпчэки атлетикаҕа, оҕунан ытыыга, дуобакка ордук үчүгэй түмүктэри көрдөрөллөр.
Уопсай Арссыыйа успуордун бэлиитикэтин чэрчитинэн, дойдубут сүүмэрдэммит хамаандатыгар киирэн, успуорт өттүгэр дойду чиэһин көмүскүүр сүрүн сыалбыт-сорукпут. Мас тардыһыытыгар Арассыыйа, Аан дойду чөмпүйүөннэринэн киэҥ туттабыт – Анатолий Баишев, Василий Алексеев, Саина Седалищева, Афанасий Петров – мэлдьи тыҥааһыннаах киирсиилэри көрдөрөн, үрдүкү чыпчаалга тахсаллар.
2018 сыл саҥа аата, уолбут Айсен Ботуев (тириэньэр Заболоцкай Д.В.) Туймаада ыһыаҕын Дыгын Ооньууларын боруонса призера буолан соһутта, үөртэ. Айсен быйыл үөрэҕин бүтэрэр сылыгар өссө да ситиһиилэри көрдөрүө диэн эрэнэбит.
Үс дуобат гроссмейстердарыттан биирдэстэрэ Рена Ноговицына (тириэньэр Н.Н.Кычкин-II) бэйэтигэр тэҥнэһэр оонньооччуну көрсө илик. Кини хас да төгүллээх Арассыыйа, Аан дойду чөмпүйүөнэ.
Билигин олимпийскай эрэллэрбититтэн биирдэстэрэ боксер Борис Сидоров (тириэньэр А.Слепцов) уонна буулдьанан ытыынан дьарыктанар Александр Петров (тириэньэр Петров С.А.) аармыйаҕа да сырытталлар, утумнаахтык дьарыктаналлар, – диэн кэпсээтэ Татьяна Колесова.
Нэһилиэнньэни кытта үлэ Арассыыйа үрдүнэн ыытыллар ГТО ыспартыыбынай комплекс нөҥүө барар. Сыл ахсын саас уонна күһүн оскуола оҕолоро, Чурапчытааҕы орто анал уонна үрдүк үөрэх кыһаларын, тэрилтэлэрин үлэһиттэрэ кэлэн, “Боотур Уус” стадиоҥҥа эт-хаан өттүнэн тус кыахтарын билэн, күрэхтэһэн бараллар. Маны анал үөрэхтээх судьуйалар тэрийэн, иилээн-саҕалаан ыыталлар.
Источник: “Саҥа олох” хаһыат