Коронавирус дьаҥыттан дьон-сэргэ доруобуйатын харыстыыр сыаллаах Чурапчы нэһилиэгин “Хатан” ХЭТ тэрилтэтэ кулун тутар 24 күнүттэн саҕалаан Чурапчы, Хоптоҕо, Одьулуун нэһилиэктэригэр турар уопсай дьиэлэргэ күн аайы дезинфекция үлэтин көдьүүстээхтик ыытар.

“Чурапчы нэһилиэгин иһигэр көрөр-истэр дьиэлэрбитигэр (50-тэн тахса дьиэ) барытын күн аайы тохтобула суох дезинфекциялыы сылдьабыт. 10 лиитэрэ ууга 2 устуука “Акватабс” хлор таблетканы кутан суурайан хас биирдии подъеһы, киһи таарыйыан сөптөөх сирдэрин барытын кичэйэн ыстарабыт. Күн иһигэр туох баар дьиэлэри барытын кэрийэбит. Хоптоҕо, Одьулуун нэһилиэктэр уопсай дьиэлэригэр итинник хабааннаах үлэлэр ыытылла тураллар. Бу суурадаһын киһиэхэ, кыылга туох даҕаны буортуну оҥорбот. Дьон ону өйдүүр, уопсай үлэбитигэр көх-нэм буолар”, – диэн “Хатан” ХЭТ кылаабынай инженерэ Геннадий Осипов кэпсиир.

Уолаттар үһүө буолан анал комбинезоннаах, респиратордаах, суурадаһыннаах баллоннарын сүгэн сылдьан чахчы даҕаны олус кыһаллан туран үлэлии сылдьар түгэннэрин хаартыскаҕа түһэрдим. Онон салгыы уһатыллан биэрбит, үлэҕэ тахсыбат өрөбүл күннэри көтүппэккэ “Хатан” ХЭТ үлэһиттэрэ үлэлэрин салгыыллар.

Источник: UlusMedia

Ааптар: Сэмэн Жендринскэй.