678670, с.Чурапча ул. Карла Маркса 19 +7(984)1182258 m.haacka@gmail.com

ЧУРАПЧЫГА ӨССӨ БИИР ВЫПУСКНИК “САЛЛААТ КУОЛАҺА” ЛИТЭРЭТИИРИНЭЙ ДЬҮҺҮЙҮҮТЭ СИТИҺИИЛЭННЭ

Бэҕэһээ, олунньу 22 күнүгэр, Улуу Кыайыы 75 сылын итиэннэ Аҕа дойдуну көмүскээччилэрин күннэригэр анаммыт, Аграфена Макарова аатынан Саха сиринээҕи култуура уонна искусство кыһатын өссө биир талааннаах выпускнига Святослав Лебедев “Саллаат куолаһа” (“Голос солдата”) Чурапчыттан төрүттээх буойун-суруйааччы, поэт уонна тылбаасчыт Гавриил Макаров-Дьуон Дьаҥылы хоһооннорунан литэрэтииринэй дьүһүйүүтэ ситиһиилээхтик туруорулунна.

Мин саныахпар Святослав олус уустук туруорууну бэркэ табан оҥордо. Дьуон Дьаҥылы олус да элбэх дьоһун суруйуулары дьонугар-сэргэтигэр нэһилиэстибэ быһыытынан хаалларбыт эбит. Элбэх ыччат дьону түмэ таппыт, биир бэлиэтиирим диэн Степан Кузьмич Макаров, Василий Сергеевич Соловьев-Болот Боотур уонна Иван Михайлович Павлов буойуттар ааттарынан оскуола үөрэнээччилэрэ кыттыбыттара буолар, бу эмиэ мээнэҕэ буолбатах. Онон Святославы бу бүгүҥҥү бастакы туруоруугунан итиитик-истиҥник эҕэрдэлиибин”, – диэн Чурапчы улууһун култуураҕа управлениетын начаалынньыга Дмитрий Попов үрдүк сценаттан бэлиэтээтэ.

Кырдьык бу литэрэтииринэй хоһуйууга үгүс үөрэнээччи, Петр Решетников аатынан норуодунай тыйаатыр артыыстара кыттыыны ыллылар. Сүрүн оруолу – Гавриил Макаров-Дьуон Дьаҥылы уобараһын Болтоҥо нэһилиэгин норуот айымньытын дьиэтин дириэктэрэ Петр Дьяконов толордо.

 

Бу туруорууга эрдэ үс ый кэриҥэ үлэлэспитим. Бу манна хоһоон аахпыт ыччаты эрдэттэн бэлиэтии көрөн бэлэмнэммиппит. Махтал тылларбын бэйэм Хатылым дьонугар-сэргэтигэр, нэһилиэгим баһылыгар Ульяна Атласоваҕа, оскуолам дириэктэрэ Октябрина Петроваҕа, “Айылгы” норуот айымньытын дьиэтин иһинэн бэйэм кураторбар Анастасия Егороваҕа, Чурапчытааҕы гимназия саха тылын уонна литэрэтиирэҕэ учуутала Фекла Болдовскаяҕа, кыттыыны ылбыт артыыстарга, үөрэнээччилэргэ бука барыларыгар махтанабын. Бу бүгүҥҥү бастакы туруоруум инники үлэбэр-хамнаспар улахан укулаат буолуо дии саныыбын”, – диэн Святослав Лебедев санаатын үллэстэр.

Отуттан тахса кыттааччылаах улахан туруорууну икки автобус Хатылы нэһилиэгин олохтоохторо анаан-минээн кэлэн биир тыынынан көрдүлэр. Нэһилиэк баһылыга Ульяна Николаевна Святослав үлэтин үрдүктүк сыаналаан, махтал тылларын эттэ, Хатылы нэһилиэгэ гербэлээх илиигэ кэтиллэр чаһыны бэлэх уунна.

Улууспут өссө биир үүнэн иһэр талааннаах режиссерун Святослав Лебедевы ситиһиилээх туруоруутунан эҕэрдэлиибит.

Ааптар: Сэмэн Жендринскэй. Вера Петрова хаартыскаҕа түһэриилэрэ.