Чурапчыга “Норуот көҕүлээһининэн саҥа нэһилиэк” диэн ааттаах сэминээр буолла. Манна СӨ Ыччатын парламенын уонна Чурапчытааҕы Ыччат координационнай Сэбиэтин чилиэттэрэ үлэлээтилэр.

“Үөрэхпит күнүн бастакы аҥарыгар икки бөлөҕүнэн хайдыһан үлэбитин саҕалаан эрэбит. Эдэр дьокутааттар, уопсастыбаннай түмсүүлэр, СО НКО буолан түмсэннэр, Чурапчы улууһун дьокутааттарын Сэбиэтин бэрэссэдээтэлэ Афанасий Захаров салайааччылаах бастакы бөлөҕү менеджмент үрдүкү оскуолата, Чурапчы улууһун социальнай-экономическай сайдыытыгар туһулаан онно сөптөөх практикуму, улуус дьаһалтатын мунньахтыыр саалатыгар үөрэтэ олорор. Ыччат координационнай Сэбиэтин чилиэттэрэ, улуус дьаһалтатын социальнай салаатын начаалынньыга Мария Заболоцкая салайааччылаах, “Утум” дьиэтигэр кэлэн СӨ эдэр ыччатын бырабыыластыбатын көрүүтүгэр үөрэнэ сылдьабыт. Манна биһигини граны сөпкө суруйууга, толорорго сүбэлииллэр. Ол түмүгүнэн гран суруйан түмүктээн, бэлэмнээн быйылгы бэрэсэдьиэн граныгар кыттыыны ылыахтаахпыт. Гран көмөтүнэн инникитин ыытыллар тэрээһиннэрбит харгыһа суох ыытыллалларыгар туһаныа этибит диэн саныыбыт”, – диэн улуус дьаһалтатын ыччаты кытары үлэҕэ исписэлииһэ Анастасия Спиридонова кэпсиир.

“Сөбүлэҥ түһэрсиибитин чиҥэтээри, биһиги бүгүн СӨ эдэр ыччатын парламенын кытары кэллибит. Сүрүннээн бырайыак туһунан кэпсэтиилэри ыытар сэминээр тэрийдибит. Бу олунньу 26 күнүгэр, бэрэсэдьиэн фондатын граныгар 2-с куонкурус ыытыллыахтаах, ол инниттэн чуолаан СО НКО-рга бырайыактарын бэлэмнии сылдьар дьону түмэммит гран сайаапкатыгар сөпкө толоруу туһунан үлэни ыыта сылдьабыт. Билиҥҥи туругунан 5 бырайыактаахпыт, араас хайысхаларга арахсаллар, олор истэригэр биэнсийэлээхтэр, эдэр ыччат, эдэр ыаллар бааллар. Уопсайынан чурапчылар баар кыһалҕалары наһаа өйдүүллэр, ол кыһалҕаны быһараарга көдьүүстээхтик үлэлииллэр эбит. Ол ону барытын билигин орун-оннугар сааһылаан, күммүт иккис аҥарыгар сайаапкабытын толоро сылдьабыт. Бэйэм көрүүбэр олус интэриэһинэй бырайыактаахтар, ити барыта олоххо киирэрин туһугар итиэннэ бэрэсэдьиэн фондатын гранын сайаапкаата кэккэ уустуктардааҕынан олус болҕомтолоохтук толороллоро ирдэниллэр. Мантан салгыы көмөҕө, бырабыыталыстыба чилиэттэрэ Кэбээйи улууһугар барыахтара. Үлэбит үтүө түмүктэрдээх буоларыгар баҕарабыт”, – диэн СӨ эдэр ыччатын бырабыыталыстыбатын бэрэссэдээтэлин солбуйааччыта Анастасия Сивцева санаатын үллэстэр.

Анастасия Николаевна эппитин курдук, сэминээр үтүө түмүктэрэ гран ылыытыгар көстөннөр, улууска тастан киирии үп хаҥыырыгар баҕарыллар. Онон Чурапчы уопсастыбаннай түмсүүлэригэр, ыччат координационнай Сэбиэтигэр ситиһиилэри баҕарабыт.

СӨ Ыччатын парламенын кытары улуустааҕы Ыччат координационнай Сэбиэтин чилиэттэрэ, өссө 2019 сыл сэтинньи ыйыгар Соловьев нэһилиэгэр буолбут “Вектор” форумҥа хардарыта үлэлиир туһунан сөбүлэҥ түһэрсибиттэрэ. Улуустааҕы Ыччат координационнай Сэбиэтэ бэйэтэ туспа балаһыанньаланан, устааптанан 2018 сылтан тэриллэн үлэлиир. Ити кэнниттэн СӨ Ыччатын парламена тохсунньу ыйга “Эн бириэмэҥ” улуустааҕы ыччат баалыгар кэлэн кыттыыны ылбыттара.

Ааптар: Сэмэн Жендринскэй.