Бүгүн, олунньу 9 күнүгэр, СӨ бырабыыталыстыбатын бэрэссэдээтэлэ Владимир Солодов салайааччылаах үлэлиир бөлөх Чурапчы улууһугар кэллэ. Кэлбит дэлэгээссийэни Мугудай нэһилиэгэр көрсөн, Одьулууннааҕы Чурапчы колледжын баазатыгар араас хабааннаах бырайыактары билиһиннэрдилэр.

Чурапчы улууһун баһылыга Андрей Ноговицын Владимир Викторовичка Одьулуун тыатын хаһаайыстыбатын, Болугур оҕуруот аһын үүннэриигэ ситиһиилэрин, Болтоҥо нэһилиэгин үлэлэрин хайысхатын итиэннэ Чурапчытааҕы “Чуораанчык”, Мугудайдааҕы “Чуораанчык” уһуйаан оҕону сайыннарыыга, Арыылаах орто оскуолата саҥалыы технологияҕа инники хардыыларын кэритэ сылдьан көрдөрдө. Үлэлиир бөлөххө СӨ тыатын хаһаайыстыбатын миниистирэ Александр Атласов, СӨ үөрэҕин уонна наукаҕа миниистирин 1-кы солбуйааччы Ирина Любимова сырыттылар. Итиэннэ Ил Түмэн дьокутааттара Михаил Гуляев, Павел Пинигин, Семен Никитин кэлэн кыттыыны ыллылар.

Күн иккис аҥарыгар үлэлиир бөлөх Хатылы нэһилиэгин “Көһөрүллүү түмэлигэр”, Сылаҥ нэһилиэгэр сылдьыаҕа. Ол кэнниттэн Семен Новгородов аатынан Чурапчы орто оскуолатын, Прокопий Сокольников аатынан улуустааҕы киин балыыһа уонна Чурапчытааҕы физическэй култуура уонна успуорт үнүстүүт үлэтин-хамнаһын көрүөхтэрэ-истиэхтэрэ.

Сэмэн Жендринскэй.