678670, с.Чурапча ул. Карла Маркса 19 +7(984)1182258 m.haacka@gmail.com

ВОЛЕЙБОЛГА ЭРИЛИК КУБОГЫН КЫАЙЫЫЛААХТАРА БИЛИННИЛЭР 

Тохсунньу 5-6 күннэригэр Чурапчы улууһун Хоптоҕотугар Эрилик Эристиин Кубогын иһин үһүс төгүлүн волейболга өрөспүүбүлүкэтээҕи аһаҕас турнир буолла. Сэттэ хамаанда: Чурапчы-1,2, Нам, Өлүөхүмэ, Мэҥэ Хаҥалас улууһуттан Бэдьимэ нэһилиэгэ, Хоптоҕо нэһилиэгэ уонна Дьокуускай куораттан “Aurum” волейбол кулууба кэлэн кыттыыны ыллылар.

Күрэхтэһии Олимпийскэй чөмпүйүөн Павел Пинигин төрөөбүт түөлбэтигэр, итиэннэ Павел Титович Пинигин аатынан ыспартыыбынай саалаҕа ыытылынна. Турнир үөрүүлээх чааһыгар улуус баһылыгын үп-ас уонна инвестиция боппуруостарыгар солбуйааччы, улууска волейбол бэдэрээссийэтин бэрэссэдээтэлэ Алексей Егоров, Хоптоҕо нэһилиэгин баһылыга Борис Архипов, улуус успуорка салаатын начаалынньыга Иван Оконешников, Чакыр нэһилиэгин баһылыга Константин Лебедев, успуорт бэтэрээнэ, РСФСР уонна СӨ атах оонньуутугар успуорт маастара Николай Адамов, күрэхтэһии кылаабынай судьуйата Иван Посельскай кытыннылар.

   

Иван Иванович бэйэтин этиитигэр, улууска волейбол көрүҥэ Альберт Бродников курдук күүстээх хапытааннаах хамаанда баар буолан Аммаҕа буолан ааспыт Саха сирин норуоттарын оонньууларыгар бу көрүҥҥэ кыайыы кэлбитин бэлиэтээтэ. Итиэннэ саха уолаттара атын омуктартан итэҕэһэ суох волейболга оонньуур буолбуттарын, волейбол бэдэрээссийэтэ ыспарсымыаннарга күүстээх болҕомтону уурарын эттэ.

Волейбол бэдэрээссийэтин бэрэссэдээтэлэ Алексей Гаврильевич: “Биһиги убайдарбыт уруккуттан түмсэн, үлэлээн ааспыт түөлбэлэрин “Эрилик” сопхуос саҕаттан тутуһуллан кэлбит үгэһи умнуо суохтаахпыт. Күрэхтэһии салгыы ыытыллыахтаах, ыспарсымыаннар сайдалларын туһугар маннык улахан сууманы бириис быһыытынан туруордубут”, – диэтэ.

Турнир сэттэ хамаанда кэлбитинэн эргиир систиэмэтинэн ыытылынна. Саала иһэ толору көрөөччүнэн туолбута бу Хоптоҕо нэһилиэгэ успуорка талаһыылааҕын, интэриэстээҕин туоһулуур.

 

Тыҥааһыннаах икки күннээх турнир кэнниттэн “Эрилик Эристиин Кубогын” хаһаайыттарынан Өлүөхүмэ улууһун хамаандата буолла уонна Чурапчы улууһун волейбол бэдэрээссийэтиттэн 100 тыһ. суумалаах сертификатынан наҕараадаланна. Иккис миэстэ Дьокуускай куораттан “Aurum” кулууп буолла, итиэннэ үһүс бочуоттаах миэстэҕэ Нам улууһун хамаандата тигистэ.

 

Анал номинацияларга: “Лучший нападающий” – Владимир Сидоров (Дьокуускай), “Лучший игрок” – Николай Павлов (Өлүөхүмэ), “Лучший разыгрывающий” – Николай Потапов (Нам) буоллулар уонна успуонсардар туруорбут сыаналаах бириистэрин туттулар.

 

Ааптар: Сэмэн Жендринскэй.

Источник: UlusMedia