Сэтинньи 28-29 күннэригэр Аҕа дойду Улуу сэрии бэтэрээнэ, “Кыһыл сулус” уордьан кавалера Иван Михайлович Павлов аатынан Чурапчы орто оскуолатыгар Аҕа дойду Улуу сэриитин дьоруойа, генерал-лейтенант Дмитрий Михайлович Карбышев аатынан хамсааһын декада чэрчитинэн оскуола үөрэнээччилэрин ортолоругар “Эдэр Карбышевтар” иитэр-эрчийэр хомуур буолан ааста.
Билиҥҥи кэмҥэ “Юнармия” отделение дойду 85 регионугар үлэлии-хамныы олорор, онно 400 тыһыынча үөрэнээччи сылдьан уһуйуллар. Итиннэ биһиги Чурапчыбыт үөрэнээччилэрэ эмиэ киирэ сылдьаллар. Уолаттар сыл аайы “Снежный барс” байыаннай эстафетаҕа, Иван Захаров кэриэһигэр улуустааҕы строевой уонна ырыа көрүүтүгэр, улуус бойобуой дьайыылар бэтэрээннэрин бирииһигэр көхтөөхтүк кытталлар.
Оттон быйыл Иван Павлов аатынан Чурапчы орто оскуолатын “Память” байыаннай кулууп иитиллээччилэрэ, дириэктэр Михаил Дьячковскай салайааччылаах Москва куоратынан байыаннай чаастарга ону таһынан Ильмень күөлгэ хорсуннук охтубут саха саллааттара көмүллэ сытар сирдэригэр төрөөбүт төрүт буордарын илдьэн куттуллар, сибэкки дьөрбөтүн ууран кэллилэр.
Тэрээһиҥҥэ уопсайа 14 оскуолаттан 107 үөрэнээччи кэлэн кытынна. Үөрүүлээх чааска Таатта уонна Чурапчы улуустарын байыаннай хамыһаара, “Эдэр Карбышевтар” региональнай уопсастыбаннай хамсааһын штабын начальнига Николай Андреев, Ил Түмэн дьокутаата, улуустааҕы “Юнармия” хамсааһын салайааччыта Семен Никитин, СӨ байыаннай хамыһаарын көмөлөһөөччүтэ, полковник Николай Гребенников, улуус бойубуой дьайыыларын бэтэрээннэрин Сэбиэтин бэрэссэдээтэлэ Илья Березкин, улуус дьаһалтатын каадыры кытары үлэҕэ отдел салайааччыта Дьулустан Егоров, улуус үөрэҕин салаатын начальнигын солбуйааччы Илья Чичигинаров, Иван Павлов аатынан Чурапчы орто оскуолатын дириэктэрэ Михаил Дьячковскай, Таатта улууһун Чөркөөх мусуойун салайааччы, СӨ хаһаактарын Сэбиэтин чилиэнэ Николай Попов кыттыыны ыллылар.
Икки күн устата үөрэнээччилэргэ теоретическай уонна практическай дьарыктар быыстала суох ыытылыннылар. Манна аҥардас строевой көрүүнэн эрэ муҥурдаммакка инженернэй үөрэх ымпыгын-чымпыгын, эт-хаан өттүнэн араас хабааннаах хамсаныылары, байыаннай саа-саадах кистэлэҥин, сэп-сэбиргэл, эстэр тэриллэр тутулларын, үлэлиир механизмнарын бэтэрээн саллааттар, итиэннэ аармыйаттан саҥардыы сулууспалаан кэлбит уолаттар билиилэрин кытары билистилэр. Иван Павлов аатынан “Албан аат” мусуойугар сылдьан Аҕа дойду сэрии устуоруйатын үөрэтэн биллилэр, туруоруллубут экспонаттары үөрэ көрдүлэр.
“Туохтан даҕаны иҥнибэккэ иннигит диэки хардыылаан, оҕолорго анаан маннык дьаһаллары ыытаргытын улаханнык сэргээтим. Чурапчылар маладьыастар. Иван Павлов аатынан орто оскуола салалтата бу Аҕа дойду улуу сэриитин дьоруойа, генерал-лейтенант Карбышев саҕалаабыт инженернэй войскалар үөрэхтэрин оскуолатын биир салаата гынан үлэлэтэрин сөбүлээтибит. Өссө даҕаны маннык дьаһаллары ыытар буолуҥ, хайаан даҕаны кэлэн кыттыыны ылыахпыт”, – диэн полковник Николай Григорьевич Гребенников бэлиэтээтэ.
Ааптар: Сэмэн Жендринскэй.
Источник: UlusMedia